Galicia inicia a desescalada con 564 pacientes con Covid hospitalizados e 6.273 casos activos
A taxa de positividade baixa a un 3,9% e os novos contaxios diarios redúcense lixeiramente a 272.
Por Europa Press / Redacción | SANTIAGO DE COMPOSTELA | 26/02/2021 | Actualizada ás 10:59
Galicia inicia este venres, 26 de febreiro, a desescalada progresiva co alivio de restricións con 564 pacientes hospitalizados con coronavirus, 22 menos que a xornada anterior, e cos casos activos que manteñen a tendencia descendente e sitúanse en 6.273.
Así se reflicte nos datos actualizados na mañá deste venres pola Consellería de Sanidade con rexistros ata as 18,00 horas deste xoves, nos que se inclúen 117 pacientes con Covid-19 en UCI en toda Galicia, o que implica catro menos que a xornada anterior, e 447 noutras unidades --18 menos--.
Os pacientes ingresados con coronavirus descenden en cinco das sete áreas sanitarias, mentres que na da Coruña e Cee mantéñense sen cambios, con 42 en UCI e 145 noutras unidades; así como na de Lugo, con 13 en críticos e 27 noutras unidades.
Pola súa banda, un maior alivio experiméntano a de Santiago e Barbanza, onde aínda que soben a 17 as persoas con Covid-19 en UCI --unha máis-- baixan a 62 as que permanecen noutras unidades --oito menos--; e na de Ferrol caen a 10 o críticos --un menos-- e a 68 os doutras unidades --seis menos--.
En canto á área sanitaria de Vigo, os pacientes con Covid en UCI baixan a 16 --dous menos-- e os ingresados noutras unidades caen a 52 --un menos--; na de Ourense mantéñense en cinco os críticos e descenden a 44 os doutras unidades --tres menos--; e na de Pontevedra e O Salnés redúcense en dous os críticos ata os 14 e 49 seguen noutras unidades --sen cambios--.
MENOS CASOS ACTIVOS
Os casos activos proseguen a tendencia descendente ata situarse en 6.273, o que supón 499 menos, e seis das sete áreas sanitarias --todas experimentan unha caída-- contan con menos dun milleiro, ao baixar a de Vigo a 994. Deste xeito, a da Coruña rexistra 2.019 --a única por encima do milleiro de casos activos--; a de Pontevedra e O Salnés, 884; a de Santiago e Barbanza, 694; a de Ferrol, 665; a de Lugo, 631; e a de Ourense, 386.
MENOS CONTAXIOS
Tamén os últimos datos actualizados este venres reflicten un descenso lixeiro dos novos contaxios diarios detectados con calquera tipo de proba en Galicia ata os 272 --fronte aos 320 da xornada anterior--, deles 222 positivos confirmados por PCR nas últimas 24 horas.
Deses 222 positivos confirmados por PCR nas últimas horas, 70 corresponden á área da Coruña e Cee; 65 á de Vigo; 28 á de Pontevedra e O Salnés; outros 28 á de Santiago e Barbanza; 13 á de Ferrol; nove á de Lugo; e outros nove á de Ourense.
PCR E POSITIVIDADE
En canto á taxa de positividade --porcentaxe de infeccións por test PCR realizados-- descende a un 3,9% tras superar o 4% a xornada anterior, polo que se mantén por baixo dese 5% que a Organización Mundial da Saúde (OMS) fixa como máximo para dar por controlada a pandemia.
