A Deputación da Coruña, sen os socialistas, pide ao Goberno central un sistema de bonificacións de peaxes na AP-9

A Deputación da Coruña instará o Goberno central a establecer de maneira inmediata un sistema de bonificacións de peaxes na AP-9 "que rebaixe o custo da autoestrada e o seu impacto nos petos das familias e na competitividade das nosas empresas e no noso territorio". Así consta na moción presentada polo PP, que foi aprobada co apoio dos votos de todos os grupos, agás o PSdG-PSOE, que culpou ao PP de vetar "" a posibilidade de chegar a un acordo de todas as forzas políticas sobre aspectos vinculados coa AP-9.

O portavoz socialista, Bernardo Fernández, destacou que o seu grupo pide a execución inmediata dos 68,3 millóns de euros consignados polo Goberno nos Orzamentos Xerais do Estado do 2021 para bonificacións de peaxes e supresión da suba anual do 1%, "así como a activación do proceso de transferencia da autoestrada a Galicia".

Tamén remarcou que foi un goberno do PP "o que privatizou Audasa, o que prorrogou a concesión, que terminaba en 2012, ata o 2048 e o que votou en contra ata en dúas ocasións do traspaso da AP-9 a Galicia".

Sobre este asunto, a portavoz dos populares, Rosa Gallego, cualificou de "esperpéntico" e "incompresible" a falta de apoio dos socialistas a un texto que, entre outras cuestións, esixe a convocatoria da comisión conxunta da AP-9 para abordar coa Xunta o modelo de bonificacións.

Así mesmo, expón avanzar na transferencia a Galicia da titularidade da autoestrada "con todos os recursos necesarios para acometer as obras pendentes e para a súa idónea xestión".