A alcaldesa de Boimorto insiste en que o seu nome estaba na listaxe que a residencia municipal remitiu ao Sergas

BNG e PSOE volveron a levar ao pleno ordinario de Boimorto a polémica vacina de Novo, quen pediu a baixa no PP despois de transcender que se vacinou na residencia municipal, onde exerce funcións, defendeu, de "xefa de persoal" como "responsable última do centro", ademais doutras tarefas.

Por E.P. | SANTIAGO DE COMPOSTELA | 26/02/2021 | Actualizada ás 19:58

Comparte esta noticia

A alcaldesa de Boimorto, María Jesús Novo, insistiu en que o seu nome estaba incluído na listaxe "de persoal e usuarios" que a residencia municipal remitiu no Sergas en abril e en base ao que, segundo a súa versión, enviáronse as vacinas contra a covid-19 ao centro. Así mesmo, afirmou que ela non asinou "por escrito" ningunha autorización e, a preguntas da oposición sobre os usuarios e traballadores, afirmou que non o fixo "ninguén" da residencia.

BNG e PSOE volveron a levar ao pleno ordinario de Boimorto a polémica vacina de Novo, quen pediu a baixa no PP despois de transcender que se vacinou na residencia municipal, onde exerce funcións, defendeu, de "xefa de persoal" como "responsable última do centro", ademais doutras tarefas.

A preguntas do BNG este venres, a rexedora defendeu que foi o 17 de abril cando o Sergas pediu á residencia unha listaxe de persoal e usuarios que "para nada" nese momento estaba ligado á vacinación. Na listaxe, a pesar de que non forma parte do persoal, engadiu que figura o seu nome "como xefa de persoal e responsable última do centro", de titularidade municipal.

"En base a esa listaxe, en decembro, o Sergas remite o de vacinación, no que volve figurar o meu nome. E non asino ningunha autorización para nada", esgrimiu, mentres que os concelleiros da oposición, con Sandra Sánchez (PSOE) e Xosé Luís Rivas (BNG) como portavoces, manifestaron a súa sorpresa por esta afirmación e preguntáronlle se tampouco asinaron consentimento os traballadores e usuarios.

"Tampouco. Por escrito ninguén", remarcou a rexedora, quen, de feito, explicou que o "protocolo" é distinto agora para as doses remitidas para as traballadoras de axuda ao fogar, que si que teñen que asinar. "Revisade iso", trasladoulle Xosé Luís Rivas, aínda que foron diversos concelleiros os que manifestaron a súa sorpresa respecto diso.

BATERÍA DE PREGUNTAS DO PSOE

Durante o pleno, a socialista Sandra Sánchez leu unha batería de numerosas preguntas en relación á vacinación da rexedora, aínda que esta rexeitou contestar á maioría e esgrimiu que xa o fixo, na maior parte dos casos, na sesión extraordinaria que abordou a súa vacinación.

A portavoz socialista tamén lle insistiu en que aclarase quen da oposición lle transmitira o seu "apoio", en relación a unha afirmación da rexedora o pasado pleno. A alcaldesa esgrimiu que foi a propia socialista a que lle dixo que "sentía, pero a política é así".

Sandra Sánchez negouno e dixo que o que fixo foi mostrarlle "empatía", sobre todo "pola súa familia", pero tamén transmitirlle que debía "asumir a súa responsabilidade" e que ela, no seu lugar, o que faría sería "dimitir e marchar para casa".

A rexedora, pola súa banda, cargou contra "a política rastrera" e suxeriu que as preguntas sobre a súa vacinación que formulou a socialista "escribiullas o seu partido" e non son "importantes" para Boimorto.

Cvirus.-PSOE e BNG volverán pedir explicacións á alcaldesa de Boimorto pola súa vacina no próximo pleno municipal. M. Dylan - Europa Press
Cvirus.-PSOE e BNG volverán pedir explicacións á alcaldesa de Boimorto pola súa vacina no próximo pleno municipal. M. Dylan - Europa Press | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta