Por Europa Press / Redacción | Ourense | 28/02/2021 | Actualizada ás 16:14
O presidente da Deputación de Ourense e líder do PP ourensán, Manuel Baltar, cre que Alberto Núñez Feijóo continuará na política galega e non dará o salto á estatal para encabezar o PP, onde, ao seu xuízo, o presidente popular Pablo Casado está en disposición de "refundar o centro dereita" e chegar á Moncloa.
"A Feijóo véxoo de presidente de Galicia. Haberá unha quinta vitoria", aseverou nunha entrevista concedida a Radio Nacional este domingo na que Baltar sinalou que o xefe do Goberno galego "tivo", nun "momento importante", a súa oportunidade de postularse para a presidencia do partido a nivel estatal tras a despedida de Mariano Rajoy, pero "decidiu apostar por Galicia".
"E Galicia respondeulle de forma masiva", continuou, en referencia ás autonómicas do pasado verán nas que Núñez Feijóo revalidou a súa maioría absoluta, a cuarta consecutiva.
Sobre Casado, o responsable provincial cre que será "presidente do Goberno". "Quen o diría de (Pedro) Sánchez e outros que chegaron a presidentes", comentou antes de indicar que o presidente do seu partido enfróntase a unha "situación de fragmentación política que non pasara antes" e que o seu reto é facer que os votantes "volvan ver no PP" a organización que fixo fronte "aos peores momentos de España".
CONCELLO DE OURENSE
"Quedan aínda dous anos de mandato; poden pasar moitas cousas. O PP estará sempre para procurar a estabilidade das institucións das que forme parte". Así se pronunciou ao ser cuestionado sobre a situación no Concello de Ourense, gobernado en minoría polo alcalde e líder de Democracia Ourensá, Gonzalo Pérez Jácome, tras a ruptura o pasado verán do acordo co PP, grazas ao cal, Baltar retivo tamén a presidencia da Deputación.
Baltar defendeu que ese acordo supuxo un "horizonte de estabilidade" na cidade que permitiu a aprobación duns orzamentos e que estivese "a piques" de saír adiante o plan de urbanismo.
Deste xeito, apuntou a que a última resolución xudicial "parece que exime" a Pérez Jácome "dese asunto que pintaba tan mal", en referencia ao arquivo da denuncia presentada polos edís críticos de Democracia Ourensana que acusaban o alcalde de malversar as contas do partido e que foi o causante da ruptura do acordo de gobienro con Pérez Jácome.
Por iso, Baltar emprazou a "ver como se desenvolven os acontecementos" no goberno da capital provincial, ao que o PP regresou tras a petición de DO pola hospitalización dun dos edís do executivo, o que impedía a celebración de xuntas de goberno local.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.