Santiago presenta os orzamentos para 2021 cun grande investimento en "gasto social"
Segundo explicou a concelleira de Economía, a suspensión das regras fiscais permitiulle ao concello "endebedarse por encima do normalmente establecido".
Por E.P. | SANTIAGO DE COMPOSTELA | 01/03/2021 | Actualizada ás 16:03
O alcalde de Santiago de Compostela, Xosé Sánchez Bugallo, e a concelleira de Economía, Marta Abal, presentaron este luns en rolda de prensa os orzamentos municipais para 2021, --dotados con 125.200.077,77 euros-- cos que, segundo indicaron, "o concello aposta polo gasto social, necesario no medio dunha pandemia", e co que se prevé un endebedamento de 10 millóns de euros.
"O importe destinado a gasto social é o máis alto dos orzamentos aprobados polo concello. Este tipo de gasto increméntase en máis dun 22% (máis dun millón de euros) respecto dos fondos de 2020", explicou Marta Abal, que apuntou ademais que "este orzamento social e expansivo foi posible ao "recorrer ao aumento da débeda".
Segundo explicou a concelleira de Economía, a suspensión das regras fiscais permitiulle ao concello "endebedarse por encima do normalmente establecido", un importe que se dedicará integramente, como puntualizou o alcalde, "tal e como establece a lei", a investimentos "e non a gastos correntes".
Con todo, Sánchez Bugallo recalcou que o concello espera terminar o mandato cun endebedamento inferior ao que se enfrontaron ao chegar ao goberno. "Agora mesmo a débeda está en 11 millóns de euros. Sumando os 10 destes orzamentos, estariamos ao redor dos 21 millóns de euros, por baixo dos 23 que nos atopamos cando chegamos", explicou o alcalde, que subliñou "o excepcional da situación".
Respecto da formalización dos orzamentos, o rexedor sinalou que "non cabe a posibilidade de que non haxa presupostos" xa que, "tratándose dunha necesidade social", espera o apoio, "explícito ou mediante abstención", de todos os grupos parlamentarios.
Este luns, tal e como informou o alcalde, os orzamentos serán formulados e aprobados pola xunta de Goberno, así como enviados a todos os grupos parlamentarios. Entre o día 2 e 9 de marzo, levarán a cabo as negociacións cos diferentes partidos para "alcanzar un consenso o máis amplo posible", e así, o día 12, levar os orzamentos a pleno.
O CAPÍTULO DE INVESTIMENTOS AUMENTA MÁIS DUN 19%
A concelleira de Economía detallou o contido dunha partida coa que o concello espera "non só responder á crise provocada pola pandemia de covid-19 durante 2021, senón tamén dotar de ferramentas ao Goberno para que siga loitando en 2022".
Os capítulos de investimentos son os que rexistraron un maior aumento de dotación --un 19,82% máis que en 2020--, debido en parte ao incremento da débeda municipal. Tal e como explicou Marta Abal, os 18.482.395,67 euros cos que contan os capítulos de investimento, destinaranse a actuacións "imprescindibles no tocante a salubridade e seguridade cidadá", como son o selado do vertedoiro de Aríns e accións na depuradora da Silvouta, cun orzamento de 453.750 euros.
Neste apartado entran tamén as actuacións en materia de rehabilitación e acondicionamento de muros e noiros como os de Fontiñas e Vidueiro, para os que se destinarán 620.543 euros e aos que se sumarán ademais os remanentes deste apartado dos orzamentos de 2020.
Abal destacou ademais outras accións como o investimento na mellora e na compra de mobiliario urbano, pavillóns municipais e na iluminación pública, así como obras de reacondicionamiento da dársena de Xoán XXIII. Está prevista tamén unha partida de máis de 2.400.000 euros para investimento no rural.
Doutra banda, a responsable de economía do Goberno local informou dun incremento nas transferencias correntes "para facer fronte aos desequilibrios provocados polo coronavirus no Auditorio de Galicia e á empresa Tussa", aos que se destinarán 200.000 e 293.000 euros, respectivamente.
Tamén o apartado de gastos correntes, bens e servizos aumentou, concretamente un 2,27% respecto de 2020, e alcanzou os 50. 439.752, 67 euros, segundo indicou Abal. Un aumento "amortizado" pola diminución do custo da iluminación, "onde se aforrou máis dun millón de euros". Nesta sección, destacou os contratos para o tratamento de residuos, parques e xardíns e axuda no fogar.
Ademais, a concjala recalcou o "importante incremento" no gasto na área de educación, que leva 600.000 euros, un 12,41% máis que en 2020, debido ás limpezas anticovid, os contratos da Escola Municipal de Música e as licitacións das escolas infantís, entre outros.
