Os hostaleiros deféndense tras o descontrol da fin de semana: "Moitos non leron todo o DOG"
Di que descoñecían as novas normas.
Por Europa Press / Redacción | VIGO | 01/03/2021 | Actualizada ás 17:12
Os hostaleiros da provincia de Pontevedra atribuíron ao "descoñecemento" os incumprimentos da normativa COVID detectados "en zonas e locais concretos" o pasado fin de semana, e explicou que moitos dos responsables dos negocios non sabían que debían montar a totalidade das mesas e deixar a metade baleiras.
Así o trasladou o responsable da Federación de Hostaleiros de Pontevedra, César Ballesteros, quen sinalou que "a maioría de locais" cumpriron coas restricións de aforamento e a distancia de seguridade. No entanto, aludiu á "confusión" sobre a forma en que debían estar instaladas esas terrazas, porque moitos hostaleiros "non se leron todo o DOG" antes de reabrir os seus locais e non se decataron de que debían instalar todas as mesas para facilitar a visibilidade do aforamento reducido ao 50 %.
Ballesteros sinalou que o bo tempo provocou "unha avalancha" de clientes nestes locais, e "foi complicado que todo o mundo cumprise". "Pero o próximo fin de semana estará todo máis claro", engadiu, á vez que pediu ás institucións "campañas de concienciación" dirixidas á poboación, porque os traballadores do sector "non teñen autoridade suficiente" para apercibir aos seus clientes.
Por outra banda, sobre a obrigación de establecer rexistros de clientes a través de códigos QR, o presidente dos hostaleiros da provincia constatou que o sector se está atopando con "algúns problemas técnicos", polo que pediu "algo máis de tempo" para facer esa adaptación. Así mesmo, indicou que se están avaliando alternativas para o rexistro daqueles clientes que non dispoñan de teléfono móbil ou da aplicación necesaria.
Pola súa banda, a delegada da Xunta en Vigo, Marta Fernández-Tapias, apelou á "responsabilidade" de establecementos e clientes porque "as imaxes que se viron o fin de semana non son o desexable". Segundo recalcou, o cumprimento das normas "é bo para o sector e tamén para os seus clientes".
