O veciños de Touro e O Pino lamentan que a Xunta tardara "un ano" en tombar o proxecto da mina

A plataforma veciñal Mina Touro - O Pino NON celebrou a fin do que considera que era un proxecto "sen garantías" tras coñecerse na xornada do martes que a Xunta denega o proxecto tras a declaración de impacto ambiental desfavorable. Nun comunicado remitido aos medios, a plataforma lembra o tres anos de "resposta social" contra este proxecto, con "informes técnicos negativos e centos de organizacións sociais e locais que arremeteron con contundencia contra o que era máis que evidente".

Con todo, "a pesar das evidencias", a plataforma asegurou que se tivo que esperar ata esta semana, "un ano despois da declaración de impacto ambiental negativa", a que a Dirección Xeral de Planificación Enerxética e Recursos Naturais dese a coñecer a súa decisión de comunicar a resolución negativa do proxecto ao mercantil Cobre San Rafael SL.

A plataforma, que explica que aínda non coñece a resolución empresa a pesar de figurar como interesada na causa, espera que esta lle sexa remitida "o antes posible" e "sen ter a necesidade de requirila vía rexistro electrónico". Neste sentido, considera "esencial" que as administracións permitan que a cidadanía e as organizacións ambientais teñan dereito ao acceso á información pública "en tempo e forma" para que se lle permita defenderse.

"De non ser pola resposta social e cidadá, este proxecto e moitos outros de similares características son susceptibles de aprobación sen ningún tipo de supervisión, nin comprobación, con todas as catastróficas, terribles, calamitosas repercusións e ausencia de garantías que levan para o medio natural, cultural, como así quedou demostrado no caso do proxecto da mina de Touro", apunta.

Drenaxe áceda da mina de Touro ao seu paso por un regato. | Fonte: Plataforma Veciñal Mina Touro - O Pino NON