Por Europa Press / Redacción | Pontevedra | 04/03/2021 | Actualizada ás 14:40
A Asociación pola Defensa da Ría (APDR) presentou denuncia no Xulgado de Instrución de Garda de Pontevedra contra o presidente de Ence, Ignacio de Colmenares y Brunet, polas súas recentes palabras sobre a situación de perigo das instalacións da fábrica de Lourizán.
A denuncia foi presentada este mércores día 3 de marzo e, segundo informa o presidente da APDR, Antón Masa, céntrase en dúas cuestións fundamentais, a primeira delas no feito de tentar "chantaxear repetidamente a un alto cargo do Goberno".
En concreto, a APDR considera de "suma gravidade" que Ignacio de Colmenares acuda ata sete veces a reunirse co Secretario do Estado para que modifiquen un texto legal que "estivo en exposición pública", polo que Ence "puido alegar o que considerase oportuno".
"Pretender cambiar un texto legal mediante a presión aos órganos do Goberno non é admisible nun Estado democrático, e mesmo poida que se trate dun feito delituoso", considerou.
O outro punto refírese a a situación da planta e ao perigo que supón a falta de investimento para solucionar as súas carencias.
A APDR denuncia que, a pesar de coñecer o seu estado e que "pode derivar nun episodio ambiental de gravidade, con afectación ás persoas", a empresa decide non investir e pór "en risco o medio ambiente, as vidas dos traballadores e a poboación da contorna".
"Decidir non facelo se non se garante a permanencia da empresa en Lourizán máis aló do 2033 é optar, de forma deliberada e consciente, por atentar contra o medio ambiente e a integridade física das persoas, un feito que cualificamos de extrema gravidade e que pode ter implicacións penais", engade Masa.
"SÓ CABE ACTUAR"
A asociación dálle credibilidade ao manifestado por Colmenares cando di que a caldeira de recuperación de Ence non cumpre cos mínimos esixibles de seguridade para o medio ambiente e para as persoas e pregúntase pola validez das certificacións ambientais publicadas pola empresa.
"Nesta situación só cabe actuar para evitar que ese risco grave existente chegue a provocar ese 'susto maiúsculo' do que fala o señor presidente e que mesmo pode afectar as persoas", xustifica o colectivo ecoloxista.
Á vista destes feitos, desde a APDR solicitan a incoación das dilixencias previas para investigar e depurar as responsabilidades penais que se poidan derivar dos feitos denunciados e que se cite a Ignacio de Colmenares para prestar declaración como imputado.
GRAVADO "ILEGALMENTE"
Ante a denuncia presentada pola asociación, a empresa emitiu un comunicado no que defende que o complexo de Ence en Pontevedra "é totalmente seguro", como avala a certificación de Aenor que "acredita o cumprimento da norma internacional ISO 45.001 por parte da planta, polo seu robusto sistema de xestión da seguridade".
"De feito, os índices de seguridade de Ence Pontevedra son, ano a ano, dez veces mellores que os da industria en España", engaden desde a empresa, que lembra que a planta é inspeccionada "periodicamente -con resultados satisfactorios- por organismos de control autorizado pola Administración do Estado" nos diferentes ámbitos de aplicación da regulamentación de seguridade industrial.
Ence reitera que o extracto da intervención do CEO da empresa, cuxas manifestacións son obxecto desta denuncia, foi "gravado ilegalmente" e "non debe ser descontextualizado", senón que "debe entenderse como parte dunhas palabras dirixidas internamente ao conxunto do equipo humano da empresa".
"Este extracto, de preto de catro minutos de duración, é parte dunha intervención de máis de tres cuartos de hora. Estas palabras, sacadas do seu contexto, non reflicten o sentido nin o significado das citadas declaracións, que si quedaron adecuadamente explicadas no conxunto da intervención", defenden.
A empresa asegura que a seguridade da planta "non se pon en dúbida en ningún momento na citada intervención" e alúdese, unicamente, "ás molestias que o cheiro pode supor puntualmente para as persoas da contorna próxima á instalación".
E engade que, "minutos antes", o CEO referiuse á necesidade de "seguir mellorando día a día o comportamento ambiental das plantas de Ence, por respecto á contorna" e ás comunidades".
"No caso de Pontevedra, mencionara a necesidade de seguir mellorando o comportamento oloroso da biofábrica. Neste sentido, engadía, os equipos que máis percorrido de mellora teñen son a caldeira de recuperación e caustificacion".
"Estes equipos", engade, son "absolutamente seguros e, proba diso, é que a compañía goza do recoñecemento High Risk Protected pola máis prestixiosa compañía de seguros norteamericana, especialista en celulosa".
A empresa defende que os investimentos executados nesta instalación desde o ano 2016, de 132 millóns de euros, "garanten a seguridade absoluta" da planta.
"Só a doce anos vista, de aquí a 2033, e no caso de que non se puidesen realizar os investimentos necesarios por non contarse coa necesaria seguridade xurídica para iso, a empresa veríase obrigada a pechar a planta xa que, en todo momento, debe operar con total seguridade".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.