Coloquios, teatro, música e cinema para visibilizar o 8M en Santiago

Coloquios, debates, teatro, música e cinema en torno ao feminismo e as mulleres compoñen a programación deseñada polo Concello de Santiago con motivo do 8 de marzo, un día da muller que desde o goberno local reivindican que "non pode pasar inadvertido" ante o panorama de "retrocesos" que a pandemia trouxo para os dereitos da muller.

Este xoves, a concelleira de Igualdade, Mercedes Rosón, presentou as actividades deseñadas polo consistorio compostelán con motivo do 8 de marzo, día no que o concello organiza un acto institucional na Praza do Obradoiro ás 10,30 horas que dará paso á entrega dos Premios Xohana Torres a partir das 12,30 horas.

Os actos do luns iniciarán un programa que encherá varias semanas de actividades e iniciativas coa muller e a igualdade como protagonistas. O martes 9, Marilar Aleixandre e María López abrirán o ciclo de coloquios cunha conversa sobre a figura de Emilia Pardo Bazán na que tamén participará telematicamente a xornalista María Xosé Porteiro.

Un día despois, o mércores 10, terá lugar a estrea en liña da peza teatral 'Rosalía, muller de Compostela' da compañía Os Quinquilláns. O día 11, a decana da Facultade de Ciencias da Educación da USC, Carmen Fernández, presentará un coloquio coa xornalista Cristina Fallarás, o profesor Miguel Llorente e Consuelo Sánchez, asesora no Ministerio de Cultura e Deporte. Será a partir das 18,30 horas e poderá seguirse en liña.

A artista Xoana, acompañada de tres músicos, ofrecerá un concerto en formato acústico a partir das 20,00 horas do 12 de marzo no Teatro Principal, onde poderán retirarse entradas na tarde do mércores.

A programación retomarase catro días despois, o 16 de marzo, cun coloquio en liña da psicóloga Claudia Pradas sobre os roles de xénero na vida cotiá.

O 18 de marzo, a experta en teoloxía e feminismo Marisa Vidal Collazo abordará, tamén noutro encontro a través de Internet, a figura de Exeria, a escritora hispano-romana da Idade Antiga coñecida pola súa obra 'Itinerarium Egeriae'.

O último dos coloquios en liña terá como protagonista á divulgadora Eugenia Tenembaum, que exporá unha revisión feminista da historia da arte.

O colofón a esta programación porao a proxección de 'María Soliña', a última película do director Ignacio Vilar. Será o 27 de marzo ás 19,30 horas no autocine de Salgueiriños.