Descobren unha moeda romana no Castro de Elviña
Data do século II e está en bo estado de conservación.
Por Europa Press / Redacción | A Coruña | 04/03/2021 | Actualizada ás 19:11
O Concello da Coruña, que leva a cabo traballos arqueolóxicos no Castro de Elviña, descubriu unha moeda romana, que data do século II e que se atopa en bo estado de conservación, segundo informa.
Nela, explica, pódese recoñecer a imaxe de Faustina a menor, esposa do emperador Marco Aurelio e nai do emperador Cómodo.
Os arqueólogos explican que a moeda estaba situada na capa vexetal, en niveis moi superiores. Tamén sinalan que os procesos de formación do chan provocaron que este elemento se movese e quedase enterrado durante séculos ao crecer por enriba a vexetación.
En concreto, os profesionais localizárona "no acceso suroeste do sector 16, no que xa estiveron a realizar unha campaña en 2020" e que este ano se ampliou "para restaurar o muro e a entrada, quitando toda esa capa vexetal".
A estratexia é que, unha vez rematen as escavacións, se proceda a restaurar todo o conxunto arqueolóxico, dentro da actuación global co fin de facer do castro "o gran parque cultural do interior da cidade".
