As áreas da Coruña e Pontevedra volven abrir tras o seu peche perimetral
A medida entrará en vigor ás 00,00 horas do luns. Quedan en nivel máximo de restricións os concellos da Mezquita, Boborás e A Pobra do Brollón, que se suman ao de Soutomaior, e limitados outros 13.
Por Europa Press / Redacción | Santiago de Compostela | 05/03/2021 | Actualizada ás 17:01
O subcomité clínico de expertos reunido este venres decidiu abrir o peche perimetral das áreas sanitarias da Coruña e Pontevedra, as dúas que permanecían pechadas en Galicia, co que os seus concellos quedan limitados en mobilidade unicamente en función da súa incidencia. A medida entrará en vigor ás 00,00 horas do luns.
Así o explicou o conselleiro de Sanidade, Julio García Comesaña, quen destacou que a incidencia continúa á baixa en Galicia e informou das normas de mobilidade que rexerán desde o luns.
En concreto, ademais de eliminar o perímetro destas dúas áreas, o comité subiu a nivel máximo os municipios da Mezquita, Boborás e A Pobra do Brollón, que se suman ao de Soutomaior. Neste catro concellos, a hostalaría deberá permanecer pechada ao público e só poderá haber reunións de convivientes. Ademais, estarán pechados perimetralmente de maneira individual.
A maiores, quedan en nivel alto os municipios de Miño, Arteixo, Ponteceso e Sobrado dos Monxes, na área da Coruña; Cariño e Mugardos, na de Ferrol; Guitiriz, Lourenzá e Paradela, na de Lugo; Cambados, Ponte Caldelas e Vilanova, na de Pontevedra; e Mos, na de Vigo. Nestes, a hostalaría só poderá operar en terraza, ao 50%, e a mobilidade está permitida unicamente entre eles, independentemente da área sanitaria na que se atopen.
No resto de concellos, que inclúe, entre outros, a totalidade das áreas de Santiago e Ourense, a mobilidade está permitida entre os distintos municipios e a hostalaría poderá abrir ao 30% en interiores e ao 50% en exterior. Tanto no nivel medio como no alto, permítense reunións de non convivientes ata catro persoas e os hostaleiros teñen que pechar ás 18,00 horas.
A TAXA, EN DESCENSO
Segundo explicou a directora xeral de Saúde Pública, Carmen Durán, os índices en Galicia continúan este venres en descenso, cun numero reprodutivo por baixo de 0,8 e cun aumento nos municipios sen casos tanto no últimos sete días como a 14.
A incidencia acumulada no conxunto de Galicia está nos 44 casos por 100.000 habitantes a sete días e en 114 por 100.000 habitantes a 14, unha "melloría" que "se materializa en todas as áreas sanitarias".
Entre outras cousas, Carmen Durán destacou que ningunha área sanitaria supera os 250 casos por 100.000 habitantes a 14 días nin os 100 a sete días. De entre as grandes cidades, os mellores resultados son os de Santiago, que ten este venres 22 casos por 100.000 habitantes a sete días e 68 casos a 14.
Así mesmo, a directora xeral tamén mencionou os casos de Pontevedra e da Coruña e a súa comarca. No caso da coidade herculina, a incidencia pasou de 119 casos por 100.000 habitantes a 95 a sete días e de 293 a 229. A mellora acentúase se se ten en conta toda a comarca, que pasou de 262 casos por 100.000 habitantes a 14 días a semana pasada a 195.
Pontevedra, pola súa banda, consolida o descenso, con 31 casos por 100.000 habitantes a sete días, fronte aos 88,9 de hai unha semana. A 14 días, pasou de 174 a 120.
SITUACIÓN ASISTENCIAL
Tamén na situación asistencial hai unha "melloría reseñable", segundo contou o xerente do Sergas, José Flores.
En particular, referiuse á ocupación de camas covid, que é de 311 en hospitalización convencional, lonxe das 1.210 do pico. Tamén a ocupación en UCI baixou desde as 254 que chegaron a rexistrarse a 89.
Isto trouxo unha mellora nos plans de continxencia das áreas. Tanto A Coruña como Santiago, Lugo, Ourense e Vigo están en fase 1 tanto en hospitalización como en UCI, mentres que Ferrol está en fase 1 en hospitalización e en fase 2 en UCI. Pontevedra ten fase 2 tanto para hospitalización convencional como para críticos.
Esta mellora permitiu ir recuperando a actividade cirúrxica que tivera que ser reprogramada. Segundo contou José Flores, entre esta semana e a próxima Galicia recuperará "o 100 por cen da actividade en condicións normais".
SEN SIGNOS DE ALARMA
Pasada unha semana da entrada en vigor das medidas de incremento de mobilidade, o conselleiro de Sanidade explicou que non se está vendo "un incremento" da incidencia de forma xeral, salvo "algunhas excepcións".
"Non é algo que nos faga saltar as alarmas", dixo García Comesaña, que vinculou o incremento de casos nalgunha área a cribados ou algúnha "pequena repunta".
No entanto, o conselleiro de Sanidade asegurou que Galicia está "aínda nunha situación crítica", sobre todo atendendo á presenza de novas variantes do virus e pediu que a poboación siga cumprindo escrupulosamente as normas.
En particular, referiuse ao cumprimento da capacidade máxima en hostalaría e a respectar a ocupación do 50 por cento en terrazas, dado que mesmo ao aire libre persiste o perigo. A maiores, animou ás persoas a "pospor as cousas que se poidan facer máis adiante", para "non ter que volver atrás".
Nesta mesma liña, o doutor Pedro Rascado, membro do comité, lembrou que "a diminución de restricións trae como consecuencia un incremento de mobilidade e máis risco de contaxios", polo que pediu que non se baixe a garda.
A maiores, incidiu na situación que viven aínda as UCI e advertiu de que é necesario "que os hospitais estean nunha situación máis relaxada ante un posible incremento de incidencia".
