Uns premios Goya con moi pouco sabor galego
O coruñés Mario Casas fíxose co galardón ao Mellor actor protagonista por 'No matarás', e 'A galiña Turuleca recibiu o Goya á Mellor Película de Animación como única nomeada nesta categoría
Por Europa Press / Redacción | MADRID | 07/03/2021 | Actualizada ás 11:00
O galego Mario Casas, que se alzou co Goya ao Mellor actor protagonista na 35 edición dos premios que se celebra en Málaga, quixo dar as grazas ao público que o apoiou "desde hai 15 anos", como destacou emocionado tras recibir o premio telematicamente, como o resto de premiados.
"Moitas grazas ao público porque me apoiastes desde hai 15 anos", afirmou Casas que tamén tivo unha chiscadela de agradecemento a todos aqueles que estiveron "a tres metros sobre o ceo", en alusión a unha das súas primeiras películas.
Ao revelarse o seu nome como gañador na categoría, Casas recibiu os abrazos dos seus familiares e seres queridos cos que viu a gala e mostrou unha cabeza de 'Iron Man' que, como relatou ao público, foi un agasallo que lle prometera o seu irmán pequeno se finalmente gañaba.
Casas, nacido na Coruña en 1986, mostrouse "moi contento" co seu Goya a Mellor actor protagonista, categoría na que estaba nomeado por primeira vez, e atribuíuno non só á súa última película 'Non matarás' senón á súa carreira profesional durante os últimos anos.
"Creo que non é só por 'Non matarás', son anos atrás de películas, e creo que os académicos tamén agradeceron isto, está 'El Practicante', 'Hogar', 'El fotógrafo de Mauthausen', estou moi agradecido aos académicos e contento", subliñou Casas en rolda de prensa posterior á gala dos Goya.
O actor, que recibiu a noticia do seu premio desde a súa casa, arroupado pola súa familia, explicou que non sabía como era estar nomeado a un Goya porque nunca antes o estivo e, por iso, non lle pareceu "rara" a gala virtual senón que a "gozou". "Estaba coa miña xente, compartino coa xente que quero", engadiu.
'A GALIÑA TURULECA', MELLOR PELÍCULA DE ANIMACIÓN
Do resto de obras con selo galego, fíxose co Goya 2021 á Mellor Película de Animación 'A galiña Turuleca' (Brown Films, A.I.E., Gloriamundi Producións, S.L., Producions A Fonsagrada, Tandem Films, S.L.). A cinta era un dos galardóns seguros da noite, xa que non competía con ningunha outra produción e era a única nomeada nesta categoría.
A Academia das Artes e as Ciencias Cinematográficas de España entregou este sábado os Premios Goya, os galardóns máis importantes que se conceden no cinema español, que celebran a súa 35 edición nunha cerimonia híbrida que ten lugar por segunda vez en Málaga, presentada por Antonio Banderas e María Casado, e na que os nomeados asisten de forma telemática debido á pandemia de coronavirus.
