Por Europa Press / Redacción | SANTIAGO DE COMPOSTELA | 08/03/2021 | Actualizada ás 12:19
A Xunta, a través da Axencia Turismo de Galicia, investirá 150.000 euros en subvencións a asociacións de Amigos do Camiño de Santiago e outras entidades sen ánimo de lucro con proxectos que promocionen o Camiño de Santiago e a peregrinación.
As bases da convocatoria, de concorrencia competitiva, publicáronse este luns no Diario Oficial de Galicia (DOG), onde se especifican as dúas liñas de proxectos subvencionables. A primeira delas enfocarase en proxectos relacionados "coa acollida aos peregrinos na Comunidade".
Así, financiaranse accións de dotación de servizos, accesibilidade, novas tecnoloxías e sustentabilidade ambiental, formación e programas de hospitaleros voluntarios e accións de melloras de albergues.
A esta liña destinaranse 50.000 euros, mentres que os restantes 100.000 investiranse no segundo tipo de proxectos, os relacionados con "o estudo e a documentación do fito xacobeo, así como coa difusión da cultura xacobea".
Poderán solicitar as axudas, por vía telemática e a partir do 9 de marzo, as asociacións de Amigos do Camiño de Santiago e "outras entidades que teñan como finalidade a promoción do Camiño de Santiago e a súa peregrinación".
A orde establece ademais un límite de dúas solicitudes, unha por cada liña subvencionable, por entidade e a prohibición de presentar "solicitudes conxuntas por varias entidades".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.