Por E.P. | SANTIAGO DE COMPOSTELA | 09/03/2021 | Actualizada ás 16:50
O Concello de Pontevedra decidiu atrasar o cobro das taxas de lixo e auga, así como o imposto sobre vehículos para as persoas que o soliciten. Ademais, prevense bonificacións nas taxas de veladores (terrazas de hostalaría) debido ás restricións pola pandemia, do mesmo xeito que unha moratoria no seu pago.
Diso informou este martes a portavoz do goberno local, Anabel Gulías, nunha decisión no marco do plan de reactivación económica que puxo en marcha o Concello de Pontevedra, o denominado Plan Supera.
Anabel Gulías explicou que o goberno municipal do alcalde Miguel Anxo Fernández Lores traballa "en fórmulas que faciliten ou melloren a xestión e a liquidez das familias de Pontevedra". Neste sentido, a concelleira nacionalista anunciou que o tres primeiros bimestres dos recibos de auga, lixo e sumidoiros, así como o recibo do imposto sobre vehículos poderán ser atrasados.
A portavoz do executivo explicou que o adiamento destes recibos "terá carácter global", é dicir, está pensado para todos os cidadáns que o soliciten. "É certo que hai sectores económicos que o están pasando especialmente mal, pero tamén hai familias con diferentes casuísticas que se lles complica o día a día", apunta.
No caso dos recibos de auga, lixo e rede de sumidoiros correspondentes ao tres primeiros bimestres do ano, o prazo máximo de pago finaliza o 10 de setembro. Ata esa data, a persoa titular do recibo poderá elixir en que data prefire abonar os recibos, e para facelo debe porse en contacto coa oficina de Viaqua en Pontevedra. As persoas que non soliciten ningunha modificación, seguirán co abono dos recibos nos prazos ordinarios.
No caso do imposto sobre vehículos (IVTM) amplíase o prazo de período voluntario en dous meses máis do habitual, polo que data límite queda establecida en 7 de agosto. As persoas que desexen modificar a data de pago e que teñan este recibo domiciliado, deben dirixirse á súa entidade bancaria devolvelo e pasar a pagalo na nova data escollida. A domiciliación bancaria está prevista para o 6 de maio.
BONIFICACIÓN NA TAXA POR TERRAZAS
Gulías tamén sinalou que o Concello previu aplicar unha bonificación na taxa de veladores (terrazas de hostalaría), Ademais, avanza que o cobro, que habitualmente era no mes de xullo, atrasarase ata despois de verán.
A portavoz municipal explicou que o adiamento da taxa de veladores está determinada pola necesidade de coñecer a evolución das restricións derivadas da situación sanitaria que afectan á hostalaría, en función das cales se aplicará a fórmula de bonificación que máis se axuste ás diferentes casuísticas, como os períodos de peche ou as aperturas parciais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.