Por E.P. | Santiago de Compostela | 11/03/2021 | Actualizada ás 18:20
O deputado do BNG no Congreso, Néstor Rego, reclamou a Goberno e Xunta que negocien o pago de compensacións aos mariscadores da ría do Burgo, tras unha resposta do Goberno central, a preguntas presentadas por esta formación sobre esta cuestión, que cualifica de "inaceptable".
Nela, afirma "limítase a dicir que as competencias corresponden á Xunta sen asumir responsabilidade algunha pola execución das obras que motivan o paro da actividade".
Para o deputado do BNG resulta "indecente" e "frívola" a postura manifestada polo Goberno central "na que elude as súas responsabilidades como entidade responsable da execución das obras que suporán o cesamento da actividade marisqueira sinalando á Xunta como única competente no asunto".
Así sinala que o Ministerio para a Transición Ecolóxica (Miteco) e a Consellaría "deben sentar a negociar sen máis dilacións as axudas que precisa o colectivo".
"As competencias en materia de marisqueo posúeas, certamente, a Xunta de Galicia, pero as obras serán realizadas polo Executivo estatal". "Non pode ser que Goberno e Xunta pretendan eludir as súas responsabilidades", apostila.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.