Por X.M. Fernández | Verín | 12/03/2021 | Actualizada ás 09:30
O Concello de Verín acollerá este ciclo formativo para persoas maiores de 50 anos os vindeiros días 25, 26 de 27 de marzo grazas a un acordo de colaboración coa USC, Universidade de Santiago de Compostela.
O programa inclúe seminarios sobre temáticas diversas, e sesións prácticas, que serán impartidas por docentes da USC. Entre as materias que se abordarán neste ciclo figuran o Dereito e a Criminoloxía a Educación ou Historia e o Patrimonio. As clases impartiranse no Salón de Actos da Casa da Cultura de Verín (Rúa Irmáns la Salle).
Na presentación, o tenente de alcalde, Diego Lourenzo Moura, lembrou que para a celebración deste evento elaborouse un estrito plan para garantir a protección das persoas participantes de potenciais contaxios de Covid-19 e destacou a importancia que teñen este tipo de iniciativas para achegar os coñecemento académicos máis actualizados ao ámbito local. "Desde o Concello de Verín entendemos que democratizar o coñecemento, e facer que todas as persoas interesadas polo saber poidan acceder ao mesmo sen restricións, é esencial para a creación de conciencia democrática e ademais tamén para o exercicio dos dereitos das persoas e dos pobos".
Tamén estaba no acto Alexandre Sotelino Losada, doutor en Ciencias da Educación, profesor do Dpto de Pedagoxía e Didáctica da USC e membro do equipo organizador das xornadas. Tras indicar que o obxectivo do ciclo é achegar coñecemento fóra da universidade ás persoas interesadas en adquirilo, explicou que "todas as universidades teñen tres funcións: a primeira e investigar, a segunda a docente e a terceira é a transferencia. De nada nos sirve investigar se ese coñecemento non vai en prol da sociededade".
A inscrición no ciclo é de balde e as interesadas e interesados poden anotarse vía telefónica ou de forma presencial segundo indica o Concello de Verín na súa web. O programa está tamén detallado na mesma páxina.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.