Marcha de centos de hostaleiros en Santiago para pedir ás administracións "un plan de rescate real"
No día no que se cumpriu un ano desde que a Xunta de Galicia declarase a situación de emerxencia sanitaria, os manifestantes gritaron proclamas contra o presidente do Goberno galego, Alberto Núñez Feijóo, como "Alberto, queremos o bar aberto".
Por Europa Press / Redacción | SANTIAGO DE COMPOSTELA | 13/03/2021 | Actualizada ás 20:00
Centos de empresarios de hostalaría de distintos puntos de Galicia déronse cita en Santiago de Compostela este sábado, día no que se cumpre un ano desde a declaración da emerxencia sanitaria por parte da Xunta, nunha manifestación para pedir ás administracións públicas "un plan de rescate real" non con axudas, senón con "indemnizacións".
A marcha, convocada pola Plataforma en Defensa da Hostalaría Galega, partiu pasadas as 19,00 horas da Alameda compostelá, onde se congregaron os participantes, que portaban pancartas nas que se podían ler mensaxes como 'Plan de rescate xa' e 'Hostalaría somos todos'.
En declaracións aos medios ao comezo da protesta, un dos directivos da Asociación de Hostalaría de Compostela e membro da plataforma convocante, Lois López, lamentou que "un ano despois" do inicio deste "calvario" o sector segue "sen un plan alternativo".
O groso das súas reivindicacións resúmense agora nun documento no que solicitan un plan "a medio prazo, de tres ou catro anos", que inclúa "unha serie de reformas lexislativas" concretos para a hostalaría e sectores dependentes desta.
Neste documento, a plataforma solicita unha "compensación" do 50% sobre a facturación media entre os anos 2016 e 2019 --do 75% para os locais de lecer nocturno--, ademais de suspensión de taxas e impostos, unha rebaixa do IVE ao 4% e unha redución do 50% dos alugueres.
UNHA PROPOSTA "DE BASE"
Trátase de propostas "de base" sobre as cales os hostaleiros queren que "se traballe xunto co Goberno galego" para tratar un "verdadeiro plan de rescate real". Ata o momento, explicou López, as axudas tanto da Xunta como as anunciadas esta semana polo Estado son "un punto moi importante para inxectar liquidez" nas empresas, pero son "insuficientes". Tamén compareceu ante os medios a portavoz da Asociación de Hostalaría de Pontevedra (Hoempo), Elena Vitoria, quen profundou na complicada situación que atravesan estes negocios.
"Somos empresas intervidas polo Goberno, cun nivel de débeda nestes momentos totalmente inasumible. Estamos ao momento do peche", aseverou Vitoria, quen recoñeceu que aínda que o sector debe ser "responsable", ante unha "pandemia sanitaria" as medidas deben ser "sanitarias". "Ese documento --o plan de rescate-- pensamos levalo ata a lúa, se fai falta, porque está moi traballado e é a realidade. Non queremos facernos millonarios, queremos saír adiante", recalcou.
PERCORRIDO E PROCLAMAS
No día no que se cumpriu un ano desde que a Xunta de Galicia declarase a situación de emerxencia sanitaria, os manifestantes percorreron as rúas compostelás gritando proclamas a favor do rescate e en alusión, principalmente, ao presidente galego: "Alberto, queremos o bar aberto" e "Feijóo, liante, o diñeiro por diante".
Os centos de hostaleiros percorreron as rúas do Ensanche compostelán con bombos e percusión improvisada --culleres e potas, na súa gran maioría-- que golpearon para facerse escoitar. Deste xeito dirixíronse ao Centro histórico nunha marcha que finalizou na Praza do Obradoiro.
Alí, entre o Pazo de Raxoi e a Catedral, os hostaleiros continuaron coas súas consignas perfectamente separados en columnas para manter as distancias de seguridade. De feito, os organizadores empregaron a megafonía para lembrar a necesidade de que os participantes se separasen.
