Por Galicia Confidencial | Galicia | 11/01/2007 | Actualizada ás 17:57
Quen son os donos do «green»???
Os empresarios valencianos que construirán en Monte Faro (Sanxenxo) son expertos en complexos de luxo. Desenvolven en Levante urbanizacións similares, non exentas de polémica urbanística
Un grupo de empresarios valencianos fíxose co 71% dun dos sectores do complexo residencial con campo de golf previsto en Monte Faro(Vicente Cotino Ferrer e Vicente Cotino Escribá, irmán e sobriño do Conseller popular de Agricultura da Generalitat Valenciana, Juan Cotino, escóndense detrás de Mirador de Sanxenxo S.L, empresa creada o pasado mes de maio para a promoción desta urbanización.
A familia Cotino, a través de distintas compañías, é experta na construción deste tipo de complexos residenciais. Os levantinos trouxeron a Sanxenxo o modelo valenciano de crecemento: baixa edificabilidade ligada á gran extensión de terreo que abarca e numerosas cesións e espazos verdes. As promesas de beneficio para os veciños da localidade van unidas á creación de vivendas sociais nos novos desenvolvementos urbanísticos. Os pisos de protección acaban finalmente sen adxudicarse debido a que o baixo volume construtivo permite eximir aos construtores desa obrigación.
No caso de Monte Faro, o Concello tamén lles librou desa carga. A oposición solicitou unha comisión de información e control para coñecer os pormenores desa decisión da alcaldía.Os negocios dos Cotino, con todo, non están exentos de polémica. As súas aspiracións construtivas contaron cunha especial oposición veciñal e política en dúas ocasións, en ambos casos en Concellos gobernados polo Partido Popular.
Espazo natural O campo de golf Coto de Catalá, en Llíria, cuxo plan foi aprobado polo pleno municipal o pasado 19 de xaneiro de 2006, prevé a construción dun green de 500.000 metros cadrados e 2.006 vivendas, ademais de hoteis, un club social e dotación comercial. A urbanización afectaba a un pequeno núcleo de casas, coñecido como Tos Pelat, que se opuxo desde o principio ao proxecto. Segundo o colectivo veciñal, o Concello de Llíria cualificou como chan urbanizable uns terreos de especial protección coñecidos Coto Catalá, en 2001, durante a revisión do Plan Xeral de Ordenación Urbana do municipio.
A Consellería de Medio Ambiente opúxose ao plan e solicitou a modificación do mesmo. Por entón, a empresa Residencial A Maimona S.A, ligada a Vicente Cotino, xa adquirira a explotación agraria Roturaciones e Cultivos S. A, situada no futuro campo de golf. A comisión de urbanismo da Generalitat acabou finalmente por dar vía libre ao proxecto. Os promotores houberon de ceder terreos ao Concello, que foron catalogados como parque natural. A urbanización pasou de case 2.600 vivendas ás 2.006 definitivas. No caso dos piñeirais de Monte Faro, que contan cunha extensión próxima aos 200.000 metros cadrados, os terreos foron cualificados como urbanizables polo Plan Xeral de Ordenación Municipal, aprobado definitivamente en febreiro de 2003 por Telmo Martín.
A asociación Ecoloxistas do Salnés e outras asociacións presentaron alegacións ao Plan esgrimindo que a operación atendía unicamente a intereses «exclusivamente económicos» e prognosticaba que os danos ocasionados pola edificación masiva na zona acabarían cun área de alto valor medioambiental. Entre os atractivos do lugar, Ecoloxistas do Salnés destacaba a cabeceira de ríos e regatos, o alto valor paisaxístico, agrícola e forestal, así como a presenza de elementos de protección de patrimonio.
O plan de urbanización de Monte Faro inclúe finalmente un parque forestal con especies autóctonas e un complexo arqueolóxico. Ronda á valenciana Os empresarios que hoxe construirán en Sanxenxo son tamén os adxudicatarios en Benissa (Alacante) dun proxecto similar ao que a Consellería de Política Territorial denegou ao alcalde, Telmo Martín; a circunvalación de Sanxenxo, máis coñecida como a Ronda. A empresa Ronda Norte, da que é presidente Vicente Cotino, resultou concesionaria do proxecto de urbanización. O Concello de Benissa, do PP, aprobou o plan dous días antes de que cambiase a Lei Urbanística Valenciana. O proceso de adxudicación foi denunciado pola oposición ante a Unión Europea por considerar que incumpre as normas comunitarias. De xeito parecido ao previsto por Telmo Martín en Sanxenxo, a circunvalación de Benissa prevé a apertura dun novo vial de 30 metros de ancho e 800 metros de longo.
En torno á avenida, aprobouse a construción de 2.000 novas vivendas.Ronda Norte foi defendida polo alcalde como unha alternativa necesaria para o desconxestionamento do tráfico da vila. A construción dunha nova variante, a 100 metros de distancia de plan dos Cotino, non paralizou as intencións do rexedor
Un saúdo ecoloxista desde
Salvemos Sanxenxo".
INFORMACIÓN SOBRE OS PROTAGONISTAS:.Magnates do golf en Sanxenxo
Quen son os donos do «green»???
SAU 14: Monte Faro
¿QUE SUXEITOS ESTIVERON OU SE ATOPAN DIRECTAMENTE VINCULADOS O PROXECTO MONTE FARO?
Vicente COTINO FERRER
Vicente COTINO ESCRIVÁ
José COTINO ESCRIVÁ
Francisco COTINO SOLAZ
David PELLICER MORETÓ
Jesús Vicente GARCÍA PITARCH MARCO
Juan FLUIXÁ VALLÉS
JUAN GABRIEL COTINO FERRER (Conseller de Agricultura Pesca e Alimentación)
Empresario, Agregado do OPUS DEI e ex Delegado na Policía". Máis información aquí.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.