A Coruña e Ferrol relaman unha nova vía férrea entre as dúas cidades por ser algo "fundamental" para toda Galicia
Segundo o alcalde de Ferrol, Ángel Mato, "se se quere facer unha aposta pola recuperación e a competitividade, é o momento de apostar por esta conexión ferroviaria".
Por E.P. | SANTIAGO DE COMPOSTELA | 17/03/2021 | Actualizada ás 18:37
Os alcaldes de Ferrol e A Coruña, o socialistas Ángel Mato e Inés Rey, reclamaron a construción dunha nova liña ferroviaria entre ambas as cidades, para lograr desta maneira reducir o tempo de viaxe e que o transporte sexa "competitivo".
Este requirimento realizárono no Concello ferrolán nunha comparecencia na que ambos os rexedores estiveron acompañados polo secretario xeral do Eixo Atlántico, Xoán Vázquez Mao, e de maneira telemática polo enxeñeiro de camiños Miguel Rodríguez Bugarín.
Bugarín é autor dun estudo no que expón que para ofrecer unha conexión ferroviaria entre ambas as cidades a única opción viable pasaría por "prolongar o actual Eixo Atlántico ata Ferrol", e cifra esta actuación en máis de 700 millóns de euros.
Segundo Mato, "se se quere facer unha aposta pola recuperación e a competitividade, é o momento de apostar por esta conexión ferroviaria", xa que á súa entender "é fundamental non só para as comarcas de Ferrolterra, senón tamén para A Coruña e para Galicia".
OUTROS MEDIOS DE TRANSPORTE
Ángel Mato detallou que os tempos de viaxe entre Ferrol e A Coruña están nuns 45 minutos en autobús, nuns 35 minutos en vehículo privado, mentres que en tren aproxímanse a unha hora e cuarto. Engadiu que é necesario "recuperar a idea de que o Eixo Atlántico ferroviario vai de Ferrol á fronteira con Portugal".
Pola súa banda, a alcaldesa da Coruña, Inés Rey, advertiu de que "é necesario ter unha visión global da mobilidade" e destacou que a infraestrutura ferroviaria Ferrol-A Coruña "precisa dunha mellora e adaptación á actualidade" como "base esencial para o desenvolvemento dos municipios". Tamén puxo como exemplo a conexión da súa cidade con Santiago a través do ferrocarril, e así dixo que "estando ao dobre de distancia que Ferrol, faise na metade de tempo".
"UNHA CORREDOIRA"
O secretario xeral do Eixo Atlántico, Xoán Vázquez Mao, aseverou que "non se pode seguir sen conexións ferroviarias de calidade" entre ambas as cidades, mentres que o responsable de elaborar o estudo, Miguel Rodríguez Bugarín, incidiu en que a única solución para mellorar os tempos é "cun novo trazado".
"Por moito que poñamos un tren de alta velocidade, dos mellores do mercado, vemos que na actual liña, en aproximadamente o 90% do seu trazado, non se supera a velocidade de 75 quilómetros á hora", resaltou.
Así, fixo un símil cun automóbil ao incidir en que a situación actual da conexión ferroviaria entre Ferrol e A Coruña é "coma se metes un moi bo coche por unha corredoira" e que a única maneira de abordar o problema "é modernizar o trazado", unha actuación que o estudo cifra en 730 millóns de euros.
