Prohibidas desde este venres as queimas agrícolas e forestais
Medio Rural paraliza os permisos a partir da medianoite deste venres por mor das condicións meteorolóxicas adversas agardadas para a fin de semana.
Por E.P. | SANTIAGO DE COMPOSTELA | 18/03/2021 | Actualizada ás 13:19
A Consellería do Medio Rural prohibe a partir da medianoite deste venres as queimas de restos agrícolas e forestais de particulares debido á situación meteorolóxica en Galicia durante os próximos días. Nun comunicado, o departamento autonómico especificou que esta prohibición implica tamén que "quedan en suspenso os permisos xa concedidos, xa que as comunicacións e as autorizacións de queima carecerán de validez desde o momento da prohibición".
A decisión, da que quedan excluídas as queimas controladas que executa o Servizo de Prevención e Defensa Contra os Incendios Forestais (Spdcif), foi adoptada tras avaliar a situación meteorolóxica e analizar os indicadores técnicos que inciden no risco de incendio. Ademais, tívose en conta que a normativa --o Decreto 105/2006, que regula medidas relativas á prevención de incendios forestais, á protección dos asentamentos no medio rural e á regulación de aproveitamentos e repoboacións-- prohibe as queimas "cando as condicións meteorolóxicas poidan dificultar o seu control".
Medio Rural pediu ademais a colaboración da cidadanía para que "extreme" as precaucións e denuncie calquera actividade delituosa incendiaria da que teña coñecemento. A consellería lembrou á súa vez que o teléfono gratuíto 085 está a disposición da cidadanía para alertar en caso de detectar algún lume forestal.
