A CIG advirte de que fogares galegos "poderían ver incrementada a factura anual da luz ata nun 34%"

A CIG presentou alegacións á orde que establece os prezos dos cargos e peaxes que se aplicarán a partir do 1 de xuño, ao advertir que os fogares galegos "poderían ver incrementada a factura anual da luz ata nun 34%".

A CNMC elaborou un proxecto de orde ao que a CIG presentou alegacións para pedir a súa retirada e "que se reconsideren as peaxes e os cargos das novas tarifas para non penalizar, sobre todo, o consumo doméstico".

Respecto diso, tamén alude a determinadas actividades económicas "con forte implantación" en Galicia como as pequenas explotacións gandeiras, a hostalaría e as pemes.

No caso dos fogares, asegura que a nova distribución das peaxes e cargos na tarifa 2.0 TD (que pasa a ter dúas potencias e tres períodos) "afectaría de forma moi directa a aqueles puntos de subministración que contan actualmente con discriminación horaria" e advirte "especial incidencia nas casas con acumuladores e termos eléctricos".

Estas poderían ver incrementada a factura anual, segundo os cálculos da CIG, entre un 14% e un 32%, ao reducirse de 14 a oito horas a franxa horaria máis barata "que se aproveita para a carga destes aparellos".