Por Europa Press / Redacción | SANTIAGO DE COMPOSTELA | 22/03/2021 | Actualizada ás 18:21
A conselleira de Emprego e Igualdade, María Jesús Lorenzana, anunciou que a Xunta xa traballa no deseño dun terceiro plan de rescate para facer fronte á crise da covid dirixido ao tecido empresarial galego, que se nutrirá dos fondos que o estado achegue a Galicia,.
Lorenzana reuniuse este luns por videoconferencia cos representantes do diálogo social --Confederación de Empresarios de Galicia (CEG), CC.OO. e UGT-- e coa mesa do traballo autónomo para abordar os aspectos do novo plan, segundo informa a consellería nunha nota de prensa.
"Non queremos esperar nin un segundo, queremos ter preparadas as bases das axudas para comezar a tramitalas en canto teñamos o diñeiro", destacou a titular do departamento autonómico. A día de hoxe, tal e como sinalou Lorenzana, "non se sabe a contía da transferencia que se vai a facer á comunidade de Galicia".
Respecto diso, reclamou que se teña en conta na repartición que o 97% do tecido empresarial galego está integrado por autónomos e microempresas. "O peso que debería ter Galicia en canto a contía a transferir debería ter relación con esa realidade", subliñou.
Outra das prioridades apuntadas pola Xunta pasa por "a axilidade na tramitación", sinala Emprego e Igualdade. "Queremos simplificar, na medida do posible e dentro da marxe que deixe a administración xeral do estado, a xustificación que van ter que presentar autónomos e microempresas para poder cobrar estas axudas", sinalou a dirixente galega.
A PATRONAL PIDE "BREVIDADE"
Pola súa banda, a CEG solicitou ao Executivo central que transfira "o máis axiña posible" as axudas directas ás comunidades autónomas. Iso para que, "en canto cheguen a Galicia --e previa preparación das bases por parte da Xunta--, se poidan comezar a tramitar xa".
Así o traslada a patronal galega tras a reunión mantida polo seu presidente, Juan Vieites, coa conselleira de Emprego e Igualdade, María Jesús Lorenzana, e o resto de representantes do diálogo social co obxectivo de empezar a perfilar o terceiro plan de rescate.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.