46 denuncias por acoso sexual na administración pública desde a aplicación do protocolo de prevención da Xunta, en 2016

A secretaria xeral de Igualdade, Susana López-Abella, constatou os "resultados reais" alcanzados mediante a aplicación do protocolo de prevención de acoso sexual para empregadas públicas tras presentarse 46 denuncias desde a súa posta en marcha, que tivo lugar en 2016.

En resposta a unha pregunta do BNG na Comisión de Sanidade, Política Social e Emprego, a secretaria xeral incidiu na importancia de potenciar a corresponsabilidade e a conciliación para fomentar a igualdade e referiuse ao primeiro plan aprobado neste sentido para o período 2018-2020.

Tamén destacou que Galicia se converteu na "primeira comunidade" en adaptarse á normativa estatal ao alcanzar un "acordo pioneiro" para o establecemento do teletraballo o pasado mes de novembro e valorou as accións formativas levadas a cabo para impulsar a igualdade.

Pola súa banda, a deputada do BNG Olalla Rodil criticou que o Goberno galego non puxese en marcha un plan de igualdade a pesar de que en 2009 o entón vicepresidente da Xunta, Alfonso Rueda, anunciou "que xa estaba elaborado e que ese ano entraría en vigor".

Así, reprobou que ata 2019 non se presentase o informe de diagnóstico previo preciso para iniciar os traballos de cara ao seu desenvolvemento aos sindicatos e que non se convoque desde o pasado mes de decembro á comisión negociadora. Mentres, López-Abella asegurou que se traballa para elaborar o plan de igualdade.