O PSdeG cre que a lei galega de saúde ataca "dereitos fundamentais" e pide a súa revisión

O secretario xeral do PSdeG, Gonzalo Caballero, instou este luns a Feijóo abrir "xa" un proceso de reforma da Lei de Saúde a través do Parlamento, ante as "debilidades xurídicas evidentes" que presenta o texto actual e que mete a Galicia nun problema de "inconstitucionalidade".

Nunha rolda de prensa, Caballero asegurou ser consciente da importancia da xestión da pandemia, pero censurou o sistema "unilateral" polo que optou o PPdeG para sacar adiante a norma "sen suficientes garantías constitucionais" e "xurídicas".

Debido á actitude "pouco responsable" do PPdeG, engadiu, agora o Goberno de España e o Consello de Estado advirten de que a lei --tras a reforma aprobada en febreiro cos únicos votos dos populares-- "ten visos de inconstitucionalidade", polo que chamou a arrincar o proceso de reforma para evitar a presentación dun recurso.

En concreto, o Consello de Ministros do 16 de marzo acordou solicitar ao Consello de Estado un ditame sobre a norma sanitaria galega co obxectivo de que se pronuncie acerca da constitucionalidade de certos aspectos, por entender que restrinxen dereitos fundamentais desde o ámbito autonómico e non desde unha lei orgánica.

Así, segundo adiantou o venres 'elDiario.es', hai un informe do Consello do Estado que leva en mans do Executivo de Pedro Sánchez desde o pasado 22 de marzo e que recomenda recorrer ante o Tribunal Constitucional o apartado cinco da reforma lexislativa, que prevé a posibilidade de obrigar a cidadáns a vacinarse ou a someterse a corentenas baixo ameaza de multa, entre outros asuntos nun contexto de pandemia. Ademais, tal e como publicou 'elDiario.es', se finalmente o Goberno acode ao Constitucional, isto levaría a suspensión inmediata e cautelar dos aspectos recorridos.

A LEI "CUESTIONA DEREITOS FUNDAMENTAIS"

Ante este panorama, o responsable dos socialistas galegos criticou este luns que a reforma da Lei de Saúde --foi o Grupo Popular e non a Xunta quen a rexistrou na Cámara autonómica-- asume competencias "que non lle corresponden" á Comunidade galega e "cuestiona dereitos fundamentais".

Ademais, Gonzalo Caballero asegurou compartir a "importancia de levar adiante o proceso de vacinación" coas campañas de sensibilización adecuadas, pero insistiu en que nin en España nin en Galicia existe un problema "grave" de rexeitamento a recibir as doses, pois "a inmensa maioría" dos cidadáns acode ao chamado das autoridades sanitarias.

Finalmente, apelou ao "respecto institucional", ao Estado das Autonomías e aos dereitos e liberdades de todos para instar a "empezar a modificar xa o texto lexislativo" e a camiñar para lograr "unha nova versión" que permita solucionar esta "metedura de pata" que "non arranxa nada" e que "mete a Galicia nun problema de inconstitucionalidade".

Tras a suxestión do líder do PSdeG de volver reformar a Lei de Saúde para evitar o recurso, o portavoz parlamentario do PPdeG, Pedro Puy, puxo o foco en que o texto non tivo "ningunha advertencia de inconstitucionalidade" nin sequera desde que iniciou a súa tramitación. No caso de que o Goberno central o faga, non sería "a primeira vez que ocorre".

Por iso mesmo, Puy considera que a modificación que propón Caballero é algo "extemporáneo", xa que para abordar estes conflitos existen "canles de diálogo previstos nas propias leis", como é a comisión bilateral entre as administracións estatal e autonómica que se debe convocar para solucionar as discrepancias de constitucionalidade. "Imos deixar que sigan as normas a súa canle normal", engadiu o portavoz popular.

REUNIÓN A TRES CON FEIJÓO E PONTÓN

O secretario xeral do PSdeG, Gonzalo Caballero, insistiu de novo este luns en propor un encontro "a tres bandas" co presidente da Xunta, Alberto Núñez Feijóo e a portavoz nacional do BNG, Ana Pontón, tras as reunións bilaterais celebradas o pasado venres.

Unha posibilidade que a propia líder nacionalista non descarta posto que o BNG "vai estar sempre en calquera reunión na que estea o presidente da Xunta" co ánimo de "dar solución aos problemas deste país". No entanto, Pontón defende o formato bilateral do pasado venres e lembra que ela solicitou o encontro en calidade de "líder da oposición".

En rolda de prensa, Caballero fixo balance do encontro celebrado o pasado venres con Feijóo e que o presidente galego mantivo á súa vez con Ana Pontón, para insistir na importancia de que o próximo sexa "a tres bandas" e se materialice un diálogo "cruzado" e unha reunión "o máis interactiva e participativa" posible.

"FALSIDADES" DO PP

Na mesma xornada, Caballero aproveitou para trasladar o seu compromiso e apoio "a un sector importantísimo" como a industria do mar e censurou as "campañas baseadas en falsidades" que tentan pór en cuestión as concesións na costa galega por parte do Goberno central.

Precisamente, a ministra para a Transición Ecolóxica e o Reto Demográfico, Teresa Ribeira, publicou este domingo un fío no seu perfil de Twitter para defender que a Lei de Cambio Climático e Transición Enerxética que está en trámite no Congreso "non afecta a ningunha das concesións xa outorgadas" na liña de costa "nin ás súas prórrogas legais".