A Xunta aproveita a morte dun lobo nunha trampa ilegal para insistir que ten "un exceso de protección"

A conselleira de Medio Ambiente, Ángeles Vázquez, condenou este luns o achado dun lobo morto por unha trampa de lazo no termo municipal de Chandrexa de Queixa. O cadáver do animal foi atopado polos bombeiros forestais de Laza este domingo pasado cando acudiron á zona para apagar un incendio forestal.

"Temos que condenar este tipo de actos", dixo Ángeles Vázquez, "porque iso está prohibido e nin o podemos permitir nin o podemos consentir". "O que nunca se pode é tomar a Xustiza pola súa man", engadiu. O suceso está a ser investigado polo Servizo de Protección da Natureza (Seprona) da Garda Civil. "Espero que non se volva a repetir", comentou a conselleira, que tamén agarda "que isto non sexa unha reacción a esa norma por parte do Ministerio", polo que pediu "calma" no ámbito rural a este respecto. "Estamos aí para defendelos", apostilou.

"A min o tema do lobo preocúpame e moito", admitiu a conselleira. Ao seu xuízo, que a Comisión Estatal de Patrimonio Natural e Biodiversidade inclúa ao lobo na listaxe de Especies Silvestres en réxime de Protección Especial pode xerar "enfrontamentos na sociedade, iso é real". Trátase, engadiu a conselleira, dun "exceso de protección" do lobo "que xa está protexido en Galicia" e que "supón a desprotección doutro tipo de especies".

Neste sentido, a conselleira pediu "reflexión" ao Ministerio para a Transición Ecolóxica e o Reto Demográfico "porque se hai lobo ibérico en Galicia foi grazas a todos os galegos e as galegas, e á protección que sobre el se outorgou". "Non ter ningún control do lobo é perigoso", incidiu a conselleira. "Os extremos son perigosos", abundou. Por último dirixiu unha mensaxe ao Ministerio e ao Goberno de España para pedirlles que "lonxe de impor novas restricións aprendan do que se fixo en Galicia, Cantabria, Asturias ou en Castela-León". "Xa que ata agora actuamos en solitario", sentenciou.

Un lobo morto dun tiro, neste caso trátase dunha femia atopada na Mezquita | Fonte: Axentes medioambientais da Xunta