Boas novas: Galicia non notifica novos falecementos por Covid este mércores

A Consellería de Sanidade non notificou este mércores ningún novo falecemento vinculado coa covid-19 en Galicia, unha noticia positiva que se produce por segunda vez en seis meses despois de que o pasado sábado tampouco se comunicase ningunha vítima mortal.

En concreto, antes do sábado e deste mércores, hai que remontarse ao 27 de setembro de 2020 para atopar a última xornada na que as autoridades sanitarias non comunicaron ningunha morte por coronavirus. Desde entón, e nos seguintes seis meses ata o sábado, día 27 de marzo, informouse de falecementos todos os días.

A segunda metade do mes de xaneiro e o inicio de febreiro foron os momentos nos que máis mortes se rexistraron na terceira onda, coincidindo co pico tras as festas de Nadal. Naquelas xornadas, notificáronse en varias ocasións máis dunha trintena de vítimas mortais diarias e o máximo produciuse o 1 de febreiro, con 40 falecidos --aínda que correspondentes a varios días--.

Coa diminución na incidencia de casos e a progresiva inmunización a través da vacina ás persoas de máis idade e, principalmente, aos internos e traballadores das residencias de maiores, as cifras de vítimas mortais foron diminuíndo. Con todo, na xornada do martes, as autoridades sanitarias informaron de seis falecidos en varias xornadas na comunidade galega debido á covid-19, que elevaron 2.342 o total de vítimas desde o inicio da pandemia en Galicia.

Unha profesional sanitaria camiña fronte á residencia de maiores Coviastec, en Silleda, Pontevedra.. Álvaro Ballesteros - Europa Press | Fonte: Europa Press