Xunta e Concello de Pontevedra coinciden en pedirlle a Sánchez que cumpra o seu compromiso coa autovía A-57
O vicepresidente da Xunta lembrou que o Goberno central "prometeu un impulso que non se está producindo" e o alcalde di que "comparte" a preocupación de Rueda.
Por Europa Press / Redacción | SANTIAGO DE COMPOSTELA | 06/04/2021 | Actualizada ás 14:03
O vicepresidente primeiro da Xunta, Alfonso Rueda e o alcalde de Pontevedra, Miguel Anxo Fernández Lores reclamaron este martes ao Ministerio de Transportes que cumpra os seus compromisos coas obras de construción da autovía A-57, a coñecida como circunvalación de Pontevedra.
Nunhas declaracións efectuadas no transcurso da visita oficial ás obras da Estación de Autobuses, o vicepresidente e o rexedor coincidiron en destacar a colaboración entre ambas as administracións.
Fronte a este avance nas obras, Alfonso Rueda referiuse a cuestións que "dependen doutras administracións", sobre todo aquelas "fundamentais" incluídas nos Orzamentos Xerais do Estado para Pontevedra como son a Autovía A-57 e a ligazón de bombeiros.
"Temos que reclamar que eses compromisos se cumpran", indicou, para lembrar que, a pesar de que xa está "a empezar o segundo trimestre do ano", as obras da circunvalación van a "un ritmo absolutamente lento e non admisible" e os traballos "xa viñan atrasados desde hai moitos anos".
O vicepresidente da Xunta lembrou que o Goberno central "prometeu un impulso que non se está producindo" e insistiu en ofrecer "toda a colaboración" ao Concello de Pontevedra" para facer a forza e a presión que sexa necesaria" para que estas dúas obras "collan o ritmo que ten que coller".
Pola súa banda, o alcalde asegurou compartir "a preocupación do vicepresidente da Xunta" pola necesidade de "axilizar obras que son fundamentais para Pontevedra" e reclamou dilixencia no cumprimento do compromiso coa Autovía A-57.
