O xulgado rexeita fraude de lei na contratación dun asesor de Jácome en Ourense, xa cesado

O xulgado do social número 2 de Ourense rexeitou que exsta fraude de lei na contratación dun asesor do Concello de Ourense, cesado polo Goberno local en setembro do ano pasado. En todo caso, manifestou que é a orde xurisdicional contencioso-administrativo o que debe pronunciarse sobre o cesamento deste traballador

Na sentenza, a maxistrada explica que o litixio está excluído da orde social porque se trata dun persoal eventual e non laboral. Neste sentido, rexeitou o que defendía o demandante, que ao ser nomeado persoal eventual tamén realizaba funcións de auxiliar administrativo.

Para o xulgado non se acreditou unha "indebida utilización por parte do Concello" da figura de persoal eventual.

A maxistrada trasladou que a relación, se fose de natureza laboral, sería competencia do Xulgado do Social para decidir sobre se o despedimento debería ser declarado nulo ou improcedente, pero "non se apreciou fraude de lei na contratación do asesor", polo que subliña que "a relación non pode ser cualificada de laboral".

Así pois, destaca que ao asesor non lle foron concedidas credenciais para acceder ao dominio corporativo nin a ningunha aplicación a excepción do correo electrónico.

Ademais, as funcións que realizaba, segundo indica a xuíza na sentenza, non eran as dun auxiliar administrativo laboral, dado que "carecía de instrumento esencial para a xestión dos expedientes administrativos no Concello".

Deste xeito, expuxo que as funcións eran propias de asesores de auxiliares políticos e concluíu que, no caso de que o demandante considere oportuno recorrer o seu cesamento, é a xurisdición contencioso-administrativa a competente para pronunciarse.

O antigo asesor de Gonzalo Pérez Jácome esperaba con esta demanda que o seu despedimento fose declarado nulo afirmando que se produciu estando de baixa laboral por motivos de enfermidade e en datas próximas nas que denunciara ao seu partido, Democracia Ourensana, por presuntas doazóns forzosas.

Pola súa banda, o rexedor municipal de Ourense, Gonzalo Pérez Jácome, empregou o seu perfil na rede social Twitter para trasladar a resolución da denuncia do seu exasesor.