Pontón insta a "deixar no faiado" o traxe do Estatuto e "abrir un debate sereno" no Parlamento

A portavoz nacional do BNG, Ana Pontón, realizou un chamamento este sábado ao resto de forzas políticas para "abrir un debate sereno" no Parlamento que permita marcar unha "nova folla de ruta" institucional para Galicia e "deixar no faiado" o traxe do Estatuto. Pontón considerou que Galicia necesita "avanzar nun autogoberno real" e superar un marco de 40 anos nos que o Estatuto se consolidou como unha "ferramenta ineficaz" para solucionar os "graves problemas estruturais" de Galicia, como a cuestión demográfica, os baixos salarios, a debilidade dos servizos públicos ou o declive da lingua propia.

Así o trasladou en rolda de prensa tras a súa participación na reunión telemática do Consello Nacional do BNG, no que se analizou tanto a cuestión competencial como o marco estatutario, a evolución da pandemia así como a xestión do proceso de vacinación contra a covid-19. Pontón advertiu sobre retos como a recuperación económica e social, a repartición de fondos europeos ou a desertización industrial que sofre o territorio para xustificar que "hai que cambiar o rumbo" e "dar un paso adiante", deixando de lado un traxe que quedou "pequeno" e avanzar nunha dobre vía.

Por unha banda, propón abrir un debate "sereno" no Parlamento e unha vez se deixe detrás a pandemia, co obxectivo de dar "unha nova folla de ruta" institucional e construír a Galicia do futuro, que necesita "un Estatuto de nación do século XXI". Así mesmo, reclama a apertura "inmediata" dun proceso de negociación bilateral co Goberno central para conseguir o traspaso das competencias pendentes a Galicia e "poñer fin ao triste balance de doce anos" de Goberno de "Feijóo "sen unha soa nova transferencia".

"CENTRALISMO MADRILEÑO"

O BNG enmarcou esta demanda, á súa vez, nunha situación política marcada pola "crispación do centralismo madrileño" e "agudizada" pola convocatoria electoral. Un contexto do está "a contaxiarse" o Parido Popular de Galicia que, "no medio dunha pandemia, con graves problemas de xestión e miles de cidadáns en situación límite", decide "lanzarse e atacar" o BNG e o seu portavoz "embarrando o debate" e facendo "de oposición da oposición".

Pontón acusa a Feijóo de tentar tapar os seus erros na xestión da pandemia ou de "marcar perfil" na pugna para suceder a Pablo Casado, na que Ayuso "vai gañando por goleada". Neste sentido, pediu a Feijóo que canalice a súa "belixerancia" contra o Bloque contra a propia pandemia e na defensa dos intereses de Galicia, sobre todo tras a "debilidade" mostrada polo presidente da Xunta na reunión co responsable de Transportes, José Luís Ábalos.

Pontón denunciou que Feijóo pase de criticar "durante meses" o acordo entre BNG e PSOE para rebaixar as peaxes da AP-9 a asumir como normalidade o atraso ata xullo para beneficiarse da medida do pacto de investidura. Así mesmo, censurou a "complicidade" de Feijóo na nova discriminación para Galicia, tras negarlle Ábalos ao Porto da Coruña a condonación dunha débeda que se concedeu ás instalacións portuarias de Valencia.

DAR EXPLICACIÓNS

Ademais, o BNG insta a Feijóo a deixar de atender o contexto electoral e a centrarse na xestión da pandemia. Pontón reprochou que os maiores de 80 anos aínda "non están inmunizados" coas dúas doses da vacina "catro meses despois", do mesmo modo que "miles de dependentes" que non puideron acudir "nin teñen cita" para sacar adiante o proceso. A portavoz nacional do BNG advertiu de que Galicia está por baixo da media do Estado no ritmo de vacinación a pesar de que o Goberno "presumía de ser capaz de poñer 100.000 diarias" e esixiu un reforzo de persoal de cara á chegada masiva do antídoto en canto finalicen os problemas de subministración.

É por iso que chamou a Feijóo a acudir ao Parlamento a dar explicacións para saber o calendario "real" de vacinación e a aclarar se mantén que o 70 por cento da poboación estará inmunizada antes ou durante o verán. Tamén solicitou dar pasos "firmes" que eviten unha cuarta onda da pandemia, e mostrouse prudente á hora de valorar un posible avance da desescalada, polo menos sen coñecer os datos.