O aeroporto de Santiago cae por baixo da Coruña e Vigo en pasaxeiros e operacións en marzo

Os tres aeródromos galegos perden un 77% de pasaxeiros con respecto ao primeiro trimestre do ano pasado e quedan por baixo dos 200.000.

Por Europa Press / Redacción | SANTIAGO DE COMPOSTELA | 12/04/2021 | Actualizada ás 14:28

Comparte esta noticia

Os tres aeroportos galegos recibiron durante o mes de marzo deste ano 70.753 pasaxeiros, un 53% menos que no mesmo mes do ano anterior, no que comezaron as restricións derivadas da pandemia, o que supón unha perda conxunta de máis de 80.000 viaxeiros.

No entanto, os efectos non foron iguais para as tres terminais. As limitacións para o turismo provocaron, segundo os datos publicados por Aena, que o aeroporto de Santiago caese tanto en cifra de pasaxeiros como en número de operacións, por baixo dos de Vigo e A Coruña no terceiro mes do ano, investindo a tendencia habitual.

En concreto, en marzo só usaron o aeroporto Rosalía de Castro 22.781 persoas, un 70,8% menos que o terceiro mes de 2020 e un 89,2% menos que en marzo de 2019, previo á pandemia.

O aeroporto con mellor cifra de pasaxeiros en marzo foi Vigo, por onde pasaron 24,116 usuarios, un 71,6% menos que no mesmo mes de 2019 pero só un 16,3% por baixo de marzo de 2020. Na Coruña, pola súa banda, o número de viaxeiros caeu un 46,4% con respecto ao ano pasado e un 78,1% en referencia ao anterior, ata os 23.856

OPERACIÓNS

Tamén as operacións baixaron no conxunto dos aeroportos galegos, aínda que en menor medida que os pasaxeiros grazas ás ligazóns de carga. De forma global, foron 1.914 voos.

Por aeroportos, o que experimentou unha maior caída no terceiro mes do ano foi o de Santiago, con 455 operacións, un 45% por baixo de marzo de 2020. Tanto en Vigo como na Coruña, con todo, esta cifra repuntou en torno ao 10%, alcanzando as 568 e as 891 operacións, respectivamente.

Finalmente, en canto á carga, o aeroporto de Santiago xestionou un 101% máis que hai un ano, mentres que o de Vigo creceu un 485% neste índice e o da Coruña baixou un 28%.

Aeroporto De Santiago de Compostela. AEROPORTO DE SANTIAGO DE COMPOSTELA - Arquivo
Aeroporto De Santiago de Compostela. AEROPORTO DE SANTIAGO DE COMPOSTELA - Arquivo | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta