UU.AA. avisa que a enerxía eólica "ten que converterse nunha oportunidade, non nun castigo"

Unións Agrarias (UU.AA.) e Ventonoso asesorarán aos propietarios de terreos agrogandeiros para que presenten alegacións co ánimo de protexelos fronte á "avalancha" de parques eólicos que advirten que se aproxima á comunidade galega.

Da campaña informaron, este luns en rolda de prensa, o secretario xeral de UU.AA., Roberto García; o responsable da Asociación de Propietarios de Terreos Eólicos, Ventonoso, José Antonio Diéguez; e a da área forestal e enerxías renovables da organización agraria, Jacobo Feijoo.

García advertiu de que existe "unha decisión irreversible" que é a que promove "a descarbonización" da economía. Consciente de que a enerxía eólica "é unha realidade", subliñou que "ten que converterse nunha oportunidade e non nun castigo" para o sector agrogandeiro. Neste contexto, fixou a "prioridade absoluta" de "preservar a superficie agraria útil" galega, os terreos agrogandeiros, ante as limitacións ou expropiacións que implica o establecemento de instalacións eólicas.

Feijoo avisou de que está por chegar unha "avalancha de tramitacións", o que supón un alto volume de "parques que se van a construír", ante o que "vai ser fundamental alegar para que se exclúan parques que van afectar a terras de vocación agrogandeira". "Non é só onde se instala. Tamén o perímetro dos parques ten unha limitación", precisou.

Respecto diso, vinculou as alegacións coa necesidade de "corrixir os impactos críticos que poidan ter algúns parques" e tamén apuntou á súa vontade de apoiar aos donos na negociación coas empresas e ante a expropiación "se se dese o caso".

O obxectivo de UU.AA. e Ventonoso, segundo subliñou, é "explotar o marco legal para conseguir que os parques xeren riqueza nos territorios en que se instalen" e "que non volva pasar o que ocorreu cos encoros".

NÚMERO DE PROXECTOS

Pola súa banda, o presidente de Ventonoso, José Antonio Diéguez, cifrou en 27 os proxectos en tramitación pola vía estatal que afectan á comunidade galega, uns 3.000 megawatts solicitados.

Ao lado da administración autonómica, fixou en 90 os proxectos publicados, outros 3.000 megawatts en "diferente fase de tramitación": 26 en exposición pública (por uns 800 megawatts) e outros 64 en fase máis inicial (por 1.845 megawatts). "Ventonoso estará aí para defender aos afectados", resaltou, tras criticar que se ofrezan contratos "á baixa", por uns 3.000 euros por megawatt.

PENAS BOAS

Xustamente este luns publica o Diario Oficial de Galicia (DOG) un acordo polo que se somete a información pública unha solicitude relativa ao parque eólico Penas Boas, nos concellos de Aranga e Oza-Cesuras.

O acordo é de solicitude de autorización administrativa previa, a declaración de utilidade pública, en concreto, a necesidade de urxente ocupación que iso implica, a autorización administrativa de construción, o estudo de impacto ambiental e o proxecto sectorial de incidencia supramunicipal (proxecto de interese autonómico).

Veciños, colectivos e o BNG, entre outros, alegan que esta zona na que se proxectan este e outros parques conta con patrimonio arqueolóxico que se verá ameazado pola implantación de instalacións eólicas.

Rolda de prensa de UUAA e Ventonoso | Fonte: Europa Press