Por Europa Press / Redacción | SANTIAGO DE COMPOSTELA | 19/04/2021 | Actualizada ás 12:52
Santiago de Compostela está nun "estándar francamente bo" de casos covid, con 54 positivos activos, segundo explicou este luns o alcalde, Xosé Sánchez Bugallo, que, no entanto, chamou a que todos os veciños sigan sendo "conscientes e responsables".
A preguntas dos medios, o rexedor explicou que ao longo da semana pasada e este fin de semana se produciron varias denuncias de persoas, fundamentalmente, por incumprir o toque de queda ou circular sen máscara. Con todo, dixo, os datos "foronse reducindo" desde que o xoves se alcanzasen máximos neste ámbito.
Aínda que a situación en Santiago é boa, Sánchez Bugallo mostrouse preocupado porque "os datos doutros puntos son francamente malos", en referencia a outras comunidades autónomas. "Temos que preocuparnos de que esa onda non nos chegue ou nos chegue o máis debilitada posible", indicou o alcalde, á vez que precisou que as informacións apuntan a que o "punto álxido desta cuarta onda se alcanzará esta semana".
En canto á posible reapertura do lecer nocturno de cara ao verán, Xosé Sánchez Bugallo confiou en que "as condicións de seguridade sanitaria" o permitan, algo que dependerá "de que o ritmo de vacinación aumente de forma intensa".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.