Por E.P. | SANTIAGO DE COMPOSTELA | 19/04/2021 | Actualizada ás 17:15
O goberno municipal de Ferrol levará ao próximo pleno a proposta de adxudicación do servizo de axuda no fogar, despois de que a Mesa de contratación elevase a definitiva a oferta que obtivo a mellor puntuación.
Segundo explicou o portavoz do goberno local, Julián Reina (PSOE), este asunto será sometido á aprobación da corporación municipal "o máis axiña posible", co obxectivo de poder debatelo na sesión plenaria de fin de mes, prevista para o 29 de abril.
O edil socialista indicou que esta proposta contempla "un contrato cunha duración de dous anos, prorrogables anualmente ata un máximo doutros dous", cun orzamento de licitación, sen impostos, de 10.539.040,18 euros.
O importe da proposta de adxudicación é de 17,25 euros á hora, co que o gasto estimado máximo para o que resta de 2021 é de 3,2 millóns de euros, mentres que para o 2022 ascende a 5,4 millóns e para os primeiros meses 2023, cando se cumprirán os dous anos de vixencia, é de 2,2 millóns.
MELLORAS
Segundo detallou Reina, a empresa proposta para adxudicación "presentou na súa oferta unha serie de melloras moi importantes", como "unha bolsa de 2.500 horas anuais, a prestación de 1.190 servizos de podoloxía ao ano, 1.225 servizos de fisioterapia a domicilio ao ano, e 1.190 servizos de barbaría a domicilio ao ano, ademais de sete horas de formación para cada traballador, tamén por ano".
Tal e como recolle o convenio colectivo dos empregados deste sector, a subrogación está garantida nun servizo que na actualidade conta en Ferrol con 170 empregadas auxiliares de axuda a domicilio, mentres que oito pertencen á categoría de coordinadores. Por último, o edil ferrolán definiu este contrato como "ambicioso" e "moi competitivo", e insistiu en que vai "mellorar substancialmente o actual servizo".
En canto ao número de beneficiarios, detallou que neste momento "sitúase ao redor das catrocentas persoas", e o novo servizo permitirá atender a un mínimo de 87 usuarios máis no caso de que sexan beneficiarios de grao 3, con maior dependencia, "pero, ao haber diferentes graos, poderá estenderse a moitos máis", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.