Por Europa Press / Redacción | SANTIAGO DE COMPOSTELA | 21/04/2021 | Actualizada ás 13:24
O presidente da Xunta, Alberto Núñez Feijóo, advertiu de que "ou o Goberno --central-- cambia de opinión ou, esta vez, Ence pecha" as súas instalacións xunto á ría de Pontevedra. Así se pronunciou a preguntas dos xornalistas nun acto en Cerdedo-Cotobade, a poucas horas de que se reúna en Madrid a mesa de traballo sobre o futuro da planta, á que acode o vicepresidente económico, Francisco Conde.
Respecto diso, Feijóo subliñou que a proposta do Executivo autonómico é "de entrada non pechar" a fábrica de papel de Lourizán, pero si movela "dentro dalgún tempo" a un lugar "máis adecuado" do que está, iso si, se hai fondos europeos.
"Neste momento, necesitamos non pechar a única industria de transformación en pasta de papel que compra a 5.000 familias madeira todos os anos, que emprega a centenares de camioneiros que entran e saen todos os días da factoría e que supón máis dun 50% dos tráficos do porto de Marín", destacou Núñez Feijóo.
No actual contexto de crise, "tomar esta decisión" que implique un peche parécelle "unha enorme frivolidade", fixo fincapé o presidente galego. Por iso esperou "que deixen as cousas como están", xa que "neste momento Ence ten unha concesión". Neste extremo, criticou o cambio de postura do Goberno actual sobre esta concesión e tamén a introdución de "dificultades" para que a factoría prosiga onde está a través da lei de cambio climático.
"Ou o Goberno cambia de opinión ou, esta vez, Ence pecha. Comprendo que haxa moita xente que teña dúbidas, porque levamos tanto tempo falando diso e nunca se produciu... Pois teño que dicir que coa información que posúo e coa análise xurídica que fixo a Xunta e coa posición do Goberno central neste momento hai un risco evidente de peche definitivo de Ence", resolveu.
POUCO OPTIMISTA CON QUE HAIA UN CAMBIO
Por iso, apelou a "ver en que consiste" o encontro desta tarde en Madrid, e "se só é unha reunión máis" na que o Executivo central demostre que non cambiou "un chisco" o seu posicionamento, suposto no que será un encontro "de cortesía".
"Se, pola contra, acepta que en plena recesión é conveniente pospor o peche de Ence ata que atopemos outra industria que cre os mesmos postos de traballo e poida comprar a 5.000 familias madeira anualmente, que é a proposta da Xunta, verémolo ao final da tarde", engadiu. En calquera caso, avisou de que non é "moi optimista" en relación con este "cambio".
A proposta da Xunta, pola súa banda, é "que de entrada Ence non pode pecharse neste momento, o cal non significa que se hai fondos europeos e se hai interese por investir póidase pór unha pasteira dentro dalgún tempo nun lugar máis adecuado do que está".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.