Por E.P. | SANTIAGO DE COMPOSTELA | 23/04/2021 | Actualizada ás 12:30
A Xunta de Galicia convoca os premios de fin de carreira para o alumnado que terminou os seus estudos universitarios no curso académico 2019/2020 nas universidades do Sistema Universitario de Galicia (SUG). O obxectivo é, informa, "recoñecer o esforzo e a excelencia do alumnado universitario galego que acabou de maneira brillante a titulación".
A Consellería de Cultura, Educación e Universidade destina a esta convocatoria un orzamento de 339.500 euros. Cada un dos galardoados conseguirá un premio de ata un máximo de 3.500 euros e un diploma acreditativo. Poderá optar o alumnado que cursase de forma íntegra os estudos da titulación universitaria pola que opta ao premio nas universidades do SUG e que conseguise unha puntuación media no seu expediente académico igual ou superior a 8,5 puntos para o alumnado das ramas de coñecemento de Artes e Humanidades, Ciencias Sociais e Xurídicas, Ciencias e Ciencias da Saúde e 7,5 puntos para o alumnado da rama de Enxeñaría e Arquitectura.
Os requirimentos e forma de presentación de solicitudes poden consultarse no Diario Oficial de Galicia (DOG). O número de premios virá determinado polo número de persoas egresadas na mesma titulación. Aquelas titulacións con ata 199 persoas egresadas optarán a un premio, as que teñan entre 200 e 299 a dúas e as que conten con 300 ou máis persoas optarán a tres. As titulacións que teñan entre 400 e 499 persoas egresadas optarán a catro premios e as de máis de 500 persoas egresadas poderán optar ata cinco. As solicitudes poderán presentarse ata o 24 de maio, obrigatoriamente por medios electrónicos a través do formulario normalizado dispoñible na sede electrónica da Xunta de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.