Por E.P. | SANTIAGO DE COMPOSTELA | 23/04/2021 | Actualizada ás 19:36
O BNG demandou ao Goberno que investigue e "depure responsabilidades" polo "acoso e interrogatorio" ao que, segundo subliña o deputado nacionalista Néstor Rego, foi sometido o xornalista palestino Muath Hamed en dependencias da Garda Civil en Madrid.
Nun comunicado, o Bloque reclama explicacións ao Executivo central sobre a denuncia efectuada por Hamed, refuxiado en Biscaia xunto á súa familia, e que asegura ser sometido a un interrogatorio por parte do servizo de intelixencia israelí, o Mossad, en dependecias da Benemérita na capital estatal.
"A actuación por parte da Garda Civil é completamente irregular, partindo da base de que non ten competencias en materia de estranxeiría ou asilo. Estas corresponden á Policía Nacional e debería ser este corpo quen tivese contacto co refuxiado", sinalou o parlamentario do BNG, que considera os feitos como "un absoluto incumprimento da legalidade vixente".
Por tanto, demanda ao Goberno central que condene a actuación da Garda Civil por "acosar" a un solicitante de asilo e "permitir" que os servizos de intelixencia de Israel "actúen de maneira deliberada en territorio do Estado, sometendo ao refuxiado a un interrogatorio e a ameazas".
"Deben investigarse estas actuacións e sancionar aos responsables de seguir permitindo, agora no Estado español, a persecución que sufría este cidadán palestino no seu país de orixe pola intelixencia israelí", remarcou Rego, que tamén cre necesario que se depuren responsabilidades a nivel político pois, ao seu xuízo, "o Goberno e a Dirección da Garda Civil estarían a amparar a libre actuación do Mossad en territorio do Estado sen control e con total impunidade".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.