Os casos activos de covid-19 en centros educativos continúan en ascenso

Os casos activos de covid-19 en centros educativos non universitarios mantéñense en ascenso e xa suman 590, o que implica 14 máis que a xornada anterior. Mentres as aulas inoperativas soben en tres ata 28, aínda que segue sen haber centros pechados pola incidencia do coronavirus.

Segundo o balance difundido este sábado polas consellerías de Educación e Política Social, por áreas sanitarias, os casos activos soben nas de Vigo (+8), A Coruña (+4), Ferrol (+4) e Lugo (+1). En cambio, as áreas de Pontevedra e Santiago mantéñense sen cambios e os infectados redúcense en Ourense (-3).

A área de Vigo segue como a máis afectada de Galicia, xa que rexistra 181 casos activos de coronavirus tras sumar oito máis e 14 aulas pechadas, o que supón un aumento de catro respecto da xornada anterior.

Séguelle a da Coruña, con 148 casos, catro máis, e dúas aulas pechadas, unha máis. 

Na área de Pontevedra mantéñense en 102 as infeccións activas e continúan catro aulas pechadas debido á covid-19. 

A área de Santiago tampouco experimenta cambios no número de casos, que se mantén en 71, aínda que pasan dunha a dúas as aulas pechadas. 

Na área de Lugo increméntanse os casos nun ata alcanzar os 42 e hai tres aulas pechadas, unha menos. 

Pola súa banda, as áreas de Ourense e de Ferrol mantéñense como as que presentan un menor número de casos. Así, a primeira acumula 31 contaxios, tres menos, e mantén en dous as aulas pechadas. Mentres, en Ferrol hai 15 persoas infectadas, catro máis, e unha aula inoperativa.