Dende o 16 de abril sen contaxios nas residencias de maiores

As residencias de Galicia mantéñense sen casos de Covid-19 nin entre usuarios nin entre o seu persoal, unha situación que segue invariable desde o pasado 16 de abril e que sucede por segunda vez na pandemia tras estar sen casos positivos varios días en xullo do pasado ano. Segundo os datos actualizados este martes polas Consellerías de Política Social e Sanidade, os centros de discacidade tamén sen manteñen sen contaxios. 

Esta situación continúa despois de que, durante a terceira onda do coronavirus, as residencias galegas rexistrasen un pico de 466 usuarios infectados. Isto ocorreu o 24 de xaneiro, un día antes de cumprirse os sete días necesarios desde a administración da segunda dose da vacina para xerar inmunidade, dado que este proceso arrincou de forma xeneralizada o 18 de xaneiro.

Desde o día 25, e aínda a pesar dalgúns brotes, as residencias de maiores galegas foron experimentando un progresivo descenso na cifra de usuarios afectados. Así, o 27 de xaneiro, un mes despois do inicio da vacinación na Comunidade galega, eran 445 os usuarios positivos, mentres que o 27 de febreiro a cifra situábase nos 50.

Na actualidade, desde o venres 16 de abril, que recibiu o alta o último traballador contaxiado, non hai positivos nin entre usuarios nin entre o persoal.

Un home pasea xunto a unha muller maior nas inmediacións da residencia Albertia, a 17 de abril de 2021, en Lugo, Galicia (España).. Carlos Castro - Europa Press | Fonte: Europa Press