Por E.P. | SANTIAGO DE COMPOSTELA | 28/04/2021 | Actualizada ás 12:46
Galicia rexistrou 1.146 hipotecas constituídas sobre vivendas en febreiro, o que supón un incremento do 7,2% en comparación co mesmo mes de 2020, segundo os datos que publica este mércores o Instituto Nacional de Estatística (INE).
A comunidade galega rexistra o segundo maior incremento por autonomías, só por detrás da Rioxa (+22,2%), nun mes de caída xeneralizada (-13,8% de media). Volve a terreo positivo no caso galego, cun crecemento mensual respecto de xaneiro do 9,2%. Pola súa banda, o capital prestado foi de 115,9 millóns, un 13,1% máis que un ano antes e 1,2% máis que o mes anterior.
O total de hipotecas constituídas na comunidade galega, 1.620 (por 148 millóns), distribúense entre 49 leiras rústicas (por 6,5 millóns) e 1.571 urbanas (por 141,8 millóns). Estas últimas repártense entre 1.146 vivendas (por 115,9 millóns), 51 solares (por 5,4 millóns) e 374 doutro tipo (por 20,5 millóns). Tanto as hipotecas constituídas sobre leiras rústicas como as que se fixeron sobre urbanas correspóndense fundamentalmente con bancos.
As hipotecas canceladas en febreiro en Galicia situáronse en 1.389, delas 38 correspondentes a leiras rústicas, 990 a vivendas, sete a solares e 354 sobre outro tipo de leiras urbanas. As cancelacións déronse na súa maioría nas hipotecas constituídas en bancos: 1.278, fronte a 73 noutras entidades financeiras.
Por último, rexistraron cambios 591 hipotecas, 538 delas novaciones, dúas subrogacións do debedor e 51 do acredor. Por natureza da leira, 47 eran rústicas e 544 urbanas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.