Convocan unha manifestación "en defensa" do porto da Coruña para o 30 de maio
Reclaman unha consulta popular sobre o deseño dos usos dos peiraos interiores.
Por Europa Press / Redacción | A CORUÑA | 30/04/2021 | Actualizada ás 13:45
Entidades políticas, sociais e veciñais da Coruña e a súa área metropolitana mostraron o seu respaldo á manifestación convocada para o 30 de maio "en defensa" do porto coruñés, segundo expuxeron os promotores da iniciativa, a Comisión en Defensa do Común.
Os seus integrantes presentaron un manifesto con motivo da convocatoria desta nova mobilización ante o deseño do futuro da fachada marítima pola liberalización dos peiraos interiores co traslado de actividade a Punta Langosteira.
En concreto, demandan a condonación total do préstamo de Portos do Estado á Autoridade Portuaria da Coruña para a construción do porto exterior, "rexeitando as medidas de flexibilización da débeda ata 2035, como as anunciadas, ou a privatización e venda dos terreos portuarios para o pago desta".
Tamén expoñen a constitución dun consorcio ou ente público para a xestión do novo bordo litoral e a reordenación urbanística e de usos dos terreos portuarios, "deixando sen efecto os convenios de 2004, formalizando un novo convenio no prazo de seis meses", engaden.
Así mesmo, reclaman unha consulta popular sobre o deseño dos usos dos peiraos interiores. Ás súas demandas, expresaron o seu respaldo case 40 organizacións políticas, sociais e veciñais, como o BNG e a Marea Atlántica, así como á manifestación que coa lema 'A Coruña non se vende' partirá o día 30 da praza da Palloza para concluír en María Pita.
