Galicia recibirá 45 millóns de fondos europeos para "economía de coidados"
O obxectivo destas partidas son mellorar os sistemas de coidados de longa duración, así como modernizar os servizos sociais e "perfeccionar a accesibiliade".
Por Europa Press / Redacción | SANTIAGO DE COMPOSTELA | 30/04/2021 | Actualizada ás 17:24
Galicia recibirá 45,6 millóns de euros procedentes de fondos europeos a través do Goberno central para a articulación de medidas que supoñan reforzar e impulsar a "economía de coidados" e as políticas de igualdade e inclusión social.
Así o trasladou este venres o delegado do Goberno, José Miñones, que, nun comunicado, sinala que a Comunidade galega recibe o 6% dos 730,8 millóns que reparte o Estado entre as autonomías destes fondos xestionados polo Ministerio de Dereitos Sociais e Axenda 2030.
O obxectivo destas partidas son mellorar os sistemas de coidados de longa duración, así como modernizar os servizos sociais e "perfeccionar a accesibiliade", segundo incide a Delegación do Goberno, que pon o foco en que Galicia é a cuarta comunidade que máis fondos recibe por detrás de Andalucía, Cataluña e Madrid.
Os concellos terán peso na articulación de medidas financiadas por estes fondos, xa que polo menos un 15% dos proxectos apoiados con estas partidas deberán implicar á administración local.
VISITA A CARBALLEDA DE AVIA
Por outra banda, este venres, o delegado do Goberno, José Miñones, visitou o municipio ourensán de Carballeda de Avia, onde mantivo un encontro co seu alcalde, Luís Milía. Este concello foi un dos máis afectados pola vaga de incendios vivida en Galicia no outono de 2017, nos que un home perdeu a vida tras sufrir un accidente cando tentaba apagar a súa casa.
O plan de recuperación de terra agraria tras os incendios de 2017 foi un dos puntos abordados no encontro entre o alcalde e Miñones, que lembrou o investimento de 1,7 millóns de euros despregada na zona para o desenvolvemento de 20 proxectos.
Na súa visita, o representante do Goberno en Galicia resaltou "o compromiso" da Administración central cos municipios máis pequenos, aos que se comprometeu a apoiar con "proxectos, plans e axudas". "En Galicia hai 313 concellos e 200 deles teñen menos de 5.000 habitantes. O obxectivo é chegar a eles e levarlles as políticas dun goberno que os ten en conta, co obxectivo de que vivir nestes municipios sexa un privilexio e non unha condena", remarcou o exregidor de Ames.
