Máis de 200 alumnos e profesores dun centro educativo en Betanzos convocados a un cribado
O lugar elixido son as instalacións do propio centro educativo, onde se farán as probas PCR entre as 9,00 e as 13,00 horas.
Por E.P. | SANTIAGO DE COMPOSTELA | 03/05/2021 | Actualizada ás 15:45
A área Sanitaria da Coruña e Cee convocou para este martes, no marco dos cribados poboacionais que realiza o Servizo Galego de Saúde (Sergas) para detectar posibles casos asintomáticos de Covid-19, a 220 alumnos e profesores dun centro educativo de Betanzos.
Segundo informou esta área sanitaria, continúa cunha "intensa actividade" de procura de casos positivos de Covid-19, polo que este 4 de maio terá lugar un cribado mediante test PCR aos alumnos de Educación primaria e ESO, así como ao profesorado destes cursos do CPR Nosa Señora de Atocha de Betanzos.
En concreto, sinalaron as mesmas fontes sanitarias, o lugar elixido son as instalacións do propio centro educativo, onde se farán as probas PCR entre as 9,00 e as 13,00 horas.
