Axuda ás bandas de música populares por ser "patrimonio cultural e emocional" de Galicia
As bandas darán case un centenar de concertos ao amparo do acordo coa Federación Galega de Bandas de Música.
Por Europa Press / Redacción | SANTIAGO DE COMPOSTELA | 04/05/2021 | Actualizada ás 12:19
A Xunta enxalzou ás bandas de música populares, que, en palabras do conselleiro de Cultura, Román Rodríguez, compoñen parte do patrimonio cultural e tamén "emocional" e "económica" de Galicia pola súa achega ao tecido asociativo.
Estas palabras foron pronunciadas polo titular de Cultura no acto que serviu de escenificación para a renovación do convenio da Administración autonómica coa Federación Galega de Bandas de Música Populares. O acto, celebrado na Cidade da Cultura de Santiago, "non é" o que lle gustou" organizar ao conselleiro, que, segundo confesou, quería un "gran formato" para demostrar "a potencia" que ten "o mundo" das bandas en Galicia.
Todo iso para lanzar unha mensaxe "de optimismo e de forza" tras un ano sen actuacións por culpa da pandemia. Para Rodríguez, agora é momento de "mirar adiante" para que, respectando os "protocolos" sanitarios, a música das bandas poida regresar a rúas e prazas da xeografía galega.
"Incentivar" o traballo que realizan as bandas e "levar á rúa a alegría e cultura" que achegan son os dous obxectivos do convenio asinado este martes entre administración e a federación que integra a 94 asociacións do sector.
O proxecto, definido como "ambicioso" polo titular de Cultura, busca reforzar o papel das bandas desde a colaboración "directa", a cooperación e o "respecto mutuo" coa administración.
CONCURSO E CONCERTOS
Segundo explicou o presidente da Federación Galega de Bandas de Música, Iván Estévez, o acordo permitirá manter o concurso de composición e a organización de máis de 90 concertos distribuídos por "toda" Galicia.
Ademais, tamén achegará apoios económicos para o mantemento dos postos de traballo que dependen das bandas de música e que, en palabras de Estévez, "son un alicerce importante" para o tecido "social, educativo, cultural e tamén económico" de moitas localidades galegas.
Así as cousas, a Federación Galega de Bandas de Música deu a benvida á renovación do convenio coa Xunta tras un ano no que a pandemia de covid-19 provocou que "moita xente" se desvinculase do mundo das bandas.
