O alcalde de Ourense suspende o teletraballo no Concello coa fin do estado de alarma

O alcalde de Ourense, Gonzalo Pérez Jácome, trasladou a todos os departamentos municipais a suspensión do teletraballo no Concello de Ourense como consecuencia do fin do estado de alarma, previsto para o domingo, 9 de maio.

O Concello explica que, ante a desaparición desta figura, o rexedor acordou xunto co edil de Persoal, Armando Ojea Bouzo, que se lle comunicase a todos os traballadores municipais que, a partir do próximo luns, día 10 de maio, queda suspendido o teletraballo.

Con este obxectivo, o alcalde asinou un decreto que este mediodía foi enviado ás diferentes áreas do Concello de Ourense e do Consello Municipal de Deportes.

Con todo, o Consistorio sinala que isto non significa que se descarte o teletraballo nun futuro próximo, senón que se conxelará a activación desta medida ata que non se implante e opere con normalidade o control horario presencial o Concello de Ourense, cuxa proba piloto xa se iniciou.

O Concello lembrou que a ordenanza de teletraballo, aprobada inicialmente en xunta de goberno local, continuará a súa tramitación para antes de finalizar o 2021, pero deberá pasar antes polo pleno, ser aprobada e, posteriormente, levada a unha exposición pública de ata 30 días para posibles alegacións.

Mentres tanto, todos os traballadores do Consistorio deberán traballar presencialmente. Actualmente, uns 150 funcionarios realizan tarefas de teletraballo.

Nos próximos días, o grupo de goberno reunirase cos sindicatos para acordar a folgura nas franxas diarias a cumprir en xornada laboral, que deberán sumar 37,5 horas semanais.