Xestores galegos din que eliminar a declaración conxunta no IRPF sería "un golpe" ás familias necesitadas

Os Xestores Administrativos de Galicia critican a eliminación da declaración conxunta no IRPF, que barallaba o Goberno --aínda que a vicepresidenta Nadia Calviño aclarou que só era unha "errata"--, pois consideran que sería "unha suba de impostos encuberta" e "un golpe ás familias necesitadas".

Segundo explican, esta dedución pode supor un aforro de entre 500 e 700 euros, mentres avisan de que afectaría, sobre todo, a matrimonios maiores nos que a muller percibe poucos ingresos ou non traballa, emigrantes retornados con pensións pequenas no estranxeiro e traballadores do rural.

Ademais, os xestores advirten de que as mulleres divorciadas que fan a declaración conxunta cos seus fillos sería outro dos grupos afectados por este cambio normativo.

Os profesionais galegos consideran que en Galicia, esta medida afectaría a unha porcentaxe elevada de contribuíntes, na súa maioría matrimonios maiores.