Por E.P. | Santiago de Compostela | 10/05/2021 | Actualizada ás 15:56
Os líderes do BNG, Ana Pontón, e do PSdeG, Gonzalo Caballero, coincidiron este luns ao criticar a proposta da Xunta para alcanzar un pacto de Estado por Ferrol por considerar que se trata dunha "cortina de fume" tendo en conta que a Xunta "non asume" as súas "responsabilidades".
Nunha rolda de prensa ofrecida este luns na Cámara galega, a portavoz nacional do BNG, Ana Pontón, lamentou que, "no canto de dar solucións" a esta comarca, o "único" que ofreza o presidente da Xunta, Alberto Núñez Feijóo, son "titulares de prensa".
"Ferrol ten unha crise económica importantísima e un dos responsables desta crise chámase Alberto Núñez Feijóo", afirmou Pontón. Para a líder do Bloque, esta cuestión supón "un exemplo máis dun presidente que non lle dá solucións aos problemas deste país" e que "o único que fai é botar balóns fose e non asumir responsabilidades".
"CARTA AOS REIS MEIGOS"
Pola súa banda, o secretario xeral do PSdeG, Gonzalo Caballero, asegurou que a proposta da Xunta é unha "cortina de fume", "unha carta aos Reis Meigos sen contidos, nin compromisos" dun Goberno galego que "ten as competencias en materia industrial".
O dirixente socialista pediulle a Feijóo que "faga os deberes" para impulsar realmente a economía de Ferrolterra e lembrou que, en 12 anos de Goberno, "non tomou ningunha soa medida importante" de cara a esta comarca.
"Se o PP quere ter algunha credibilidade en Ferrolterra que tome medidas", asegurou nunha intervención na que acusou ao presidente da Xunta de exercer "a política da avestruz" ao tratar de "esconder a súa falta de iniciativa".
RESPOSTA DO PPDEG
Pola súa banda, preguntado por estas críticas, o portavoz parlamentario do PPdeG, Pedro puy, considerou que "o mellor que poden facer todas as administracións é tomarse o pacto en serio". O dirixente do PPdeG sostivo que Ferrol, dentro da crise global, ten "circunstancias específicas que lle afectan especialmente". "Tanto polos anunciados peches da central das Pontes, como a situación dos estaleiros de Navantia, como polo peche da fábrica de pas de eólico", sostivo.
Todo iso, indicou, fai que a comarca "necesite un esforzo especial" tendo en conta que a situación "é comparativamente peor ao resto da comunidade autónoma". "Sobre todo en materia industrial", manifestou para incidir en que "exporse por un pacto por Ferrol é algo que todos os partidos deberían asumir como un exercicio de responsabilidade".
"E se hai algún aspecto que lles parece que se pode corrixir, pois deberían de tentar arrimar o ombro", afirmou para incidir en que o que fai a Xunta é mostrar o seu "compromiso" cunha comarca "especialmente afectada" non só pola pandemia senón "por decisións que se adoptaron no pasado, con barcos que non chegan, peche de empresas...".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.