Correos examinará o 12 de setembro aos candidatos a 3.381 novos postos indefinidos

Correos convocou para o próximo 12 de setembro o exame que terán que realizar os aspirantes para facerse con algún dos 3.381 novos postos de persoal laboral indefinido, destinados a tarefas loxísticas, de atención ao cliente e de repartición de envíos.

Á convocatoria inicial inscribíronse un total de 149.675 persoas e os interesados xa poden consultar na páxina web da empresa pública a relación de admitidos e excluídos do proceso, aínda que Correos xa o comezou a notificar por correo electrónico.

Trátase dunha convocatoria conxunta que inclúe os postos correspondentes ás taxas de reposición aprobadas para o ano 2019 (1.381 postos), así como 2.000 postos dos contemplados no plan de estabilización de emprego temporal 2018-2020 asinado coas organizacións sindicais CC.OO., UGT, CSIF e Sindicato Libre.

En concreto, 2.356 para tarefas de repartición, 505 para axente de clasificación e 520 para atención ao cliente en oficinas. Correos defende con esta convocatoria "reforzar a marca Correos como empregadora de calidade e a aposta da compañía polo emprego estable e o desenvolvemento profesional dos seus empregados e empregadas".

Imaxe de arquivo dunha empregada de Correos.. CORREOS