Gonzalo Caballero denuncia que "hai 2.000 nenos sen praza para o curso que vén" e pide máis escolas infantís

O secretario xeral do PSdeG, Gonzalo Caballero, reclamou este martes á Xunta máis prazas infantís e denunciou "hai 2.000 nenos e nenas" en Galicia que "non teñen praza" para o ano que vén. O xefe de filas dos socialistas galegos mantivo unha reunión co goberno socialista de Guitiriz, encabezado pola alcaldesa Marisol Morandeira, coa que avaliou as necesidades do municipio.

Desde alí, Gonzalo Caballero denunciou que en Guitiriz a Xunta non fixo ningunha escola infantil e que só hai un punto de atención do concello con capacidade para 20 nenos e nenas, a pesar de que hai uns 100 menores de entre 0 e 3 anos.

"É hora de que a Xunta se comprometa coa natalidade, cos nenos e nenas e coas familias", recalcou Gonzalo Caballero, á vez que incidiu en que o Goberno galego ten que "facer un escudo de protección social" que permita "a conciliación da vida familiar e laboral", "apoiar a natalidade" e "revitalizar a demografía".

A XUNTA  "DISCRIMINA ENTRE GALEGOS"

Por outra banda, o líder do PSdeG denunciou que Feijóo "utiliza procesos de non concorrencia competitiva para discriminar á cidadanía e concellos e, deste xeito, beneficiar aos do Partido Popular". Así, criticou a apertura de convocatorias de axudas ás "00,00 horas que ás 00,09 horas xa están consumidas". "Son procedementos nocompetitivos dos que, curiosamente, adoita saír beneficiado o PP", criticou.

"Non pode ser no século XXI a Xunta non saque as axudas a través de mecanismos de concorrencia competitiva, con criterios obxectivos e que dean igualdade a todos os concellos", reprobou o máximo dirixente dos socialistas galegos, que sinalou que "cando a Xunta discrimina entre concellos, discrimina entre galegos".

Fronte a isto, incidiu, atópase o "exemplo" da Deputación de Lugo, onde o seu presidente, José Tomei, impulsou o Plan Único "co que reparte fondos entre concellos con criterios obxectivos e de igualdade". "Pedimos ao Goberno galego que apoie a xestión dos concellos, dándolle fondos ao municipalismo galego nun ano no que a Xunta recibiu 1.200 millóns de euros do Goberno de España de forma extraordinaria para cuestións vinculadas á covid", sinalou.

Neste sentido, reclamou "igualdade" e "non discriminar entre gobernos con rexedores do PP ou do BNG" porque os veciños, independentemente de quen lles goberne, "necesitan as mesmas axudas". Por todo isto, avanzou que o mércores o Grupo Socialista levará ao pleno do Parlamento unha proposición non de lei "para que a Xunta deixe de utilizar estes mecanismos".

RESPALDO ÁS DEMANDAS DE GUITIRIZ

En canto a Guitiriz, Gonzalo Caballero reivindicou o traballo do goberno socialista encabezado por Marisol Morandeira, que está a levar a cabo unha "magnífica tarefa á fronte do concello", gobernado "para os veciños" e "defendendo á xente". Así, apoiou a "paixón, vocación e ideas" da alcaldesa Marisol Morandeira e o seu equipo que traballa nas "mellores políticas sociais, para as parroquias e para o coidado do medio ambiente".

No ámbito das demandas locais, urxiu ao Goberno galego que coopere co concello de Guitiriz para facer unha escola infantil que permita atender aos menores á vez que facilitar a conciliación laboral das nais e pais do municipio.

Por outra banda, pediu á Xunta que mellore a estrada autonómica LU-242, xa que se atopa en "unha situación lamentable de falta de atención". "É necesario que a Consellería de Infraestruturas cumpra con Guitiriz e actualice e reforme esta estrada", sentenciou.

Por último, a alcaldesa se ha mostrada "encantada sempre de recibir ao secretario xeral", a quen lle trasladou as principais demandas, necesidades e proxectos do seu municipio. Así, a rexedora puxo en valor o traballo do dirixente socialista como nexo de unión entre o municipio, o Parlamento e o Goberno de España.

O secretario xeral do PSdeG, Gonzalo Caballero, visita Guitiriz (Lugo). PSDEG | Fonte: Europa Press