Publicada polo SERGAS a relación provisional de admitidos das listas de selección temporal de diversas categorías

O Diario Oficial de Galicia publica este martes o anuncio polo que se dá publicidade á relación provisional de admitidos e excluídos e os resultados provisionais de baremación, no proceso de actualización das listas de selección temporal de diversas categorías de persoal estatutario: albanel, calefactor, carpinteiro, cociñeiro, condutor, costurero, electricista, fontaneiro, lavandero, mecánico, panchador, perruqueiro, pique e telefonista.

Segundo informou a Xunta, xeráronse un total de 8.407 inscricións, sumando as do anterior proceso e as de nova xeración. A categoría con maior número de solicitudes é a de pique, con 3.480. Así mesmo, resultaron excluídas do proceso o 2,37% das solicitudes de participación. O 13,42% foron novas inscricións realizadas despois da data límite de presentación do anterior proceso.

As listas provisionais de admitidos e excluídos coa asignación da puntuación provisional e número de orde conseguida polos admitidos atópanse publicadas na web do Servizo Galego de Saúde (www.sergas.es). Ademais, os aspirantes poden consultar desde este martes no seu expediente electrónico persoal a súa posición relativa e o número de orde nas listas xeradas; así como, de ser o caso, as causas de rexeitamento dalgún dos méritos presentados, dotando de total transparencia ao proceso de selección.

Na mesma resolución, ábrese un prazo de dez días hábiles, contados a partir do día seguinte ao da publicación, para que as persoas interesadas poidan formular as alegacións que estimen oportunas con relación á súa inadmisión e aos resultados obtidos na baremación provisional. A estimación ou desestimación, tras a súa análise e valoración, incluirase na resolución pola que se publiquen as listas definitivas, que determinará a data de entrada en vigor delas.

Vacinación contra a covid-19 na área sanitaria de Santiago e Barbanza | Fonte: Sergas.