O Congreso aproba a primeira lei climática de España co único 'non' de Vox

O Pleno do Congreso dos Deputados aprobou definitivamente este xoves a primeira Lei de Cambio Climático e Transición Enerxética de España co voto favorable de todos os grupos excepto Vox, que votou en contra, e de PP e Más País-Verdes Equo, que se abstiveron, tal e como anunciaran.

A nova Lei, que será efectiva ao día seguinte da súa publicación no Boletín Oficial do Estado, contempla unha redución de emisións de gases de efecto invernadoiro do 23 por cento ata 2030 respecto dos niveis de 1990 e o obxectivo de lograr a neutralidade climática como moi tarde en 2050.

Así mesmo, fixa o reto de alcanzar unha penetración de enerxías de orixe renovable no consumo de enerxía final de, como mínimo, un 42 por cento e lograr un sistema eléctrico con, polo menos, un 74 por cento de xeración a partir de enerxías de orixe renovable, entre outras medidas para reducir emisións de gases de efecto invernadoiro, enerxías renovables e eficiencia enerxética.

No entanto, no seu trámite parlamentario, en concreto na Comisión para a Transición Ecolóxica do Congreso dos Deputados introduciuse unha emenda pola que estes obxectivos se revisarán á alza en 2023.

Ao mesmo tempo, a Lei prevé a supresión dos vehículos de combustión como moi tarde en 2040; a prohibición das prospeccións e explotación de hidrocarburos a partir da entrada en vigor da lei así como os proxectos de fracturación hidráulica e a minaría de uranio.

Doutra banda, fixa unha serie de restricións aos proxectos de enerxías renovables dirixidas a que o seu despregamento se acometa de acordo cun mapa de zonas de especial valor para a biodiversidade. Con 2023 como data tope os concellos de máis de 50.000 habitantes ou de máis de 20.000 cando teñan problemas de calidade do aire deberán contar con áreas de baixas emisións.